雖然美股隔晚美股個別發展,但無礙港股繼續反彈,港股今早低開高走,更受A股帶動,升抵本周高位。恒指今早低開98點,其後回落至28193點半日低位,A股回勇,上證逼近2800點,帶動港股愈戰愈勇,升幅擴大至最多升269點,見28628點。半日恒指報收28614點,升255點;國指則報11008點,升107點。
中美貿易戰已展開新一個回合,中美雙方自本月23日起,相互向對方160億美元商品加徵25%關稅,似乎貿易戰已無法再回頭,開始走上不歸路。美國用強硬手段向中國施壓,但中國一直未肯低頭,更一直為維護自身利益跟多貿易體制,作出必要反制,雙方拳腳交加,似乎只會導致一輪又一輪更高嘅關稅。
不過市場似乎已開始接受呢場沒完沒了嘅貿易戰,港股反彈勢頭未改,人民幣靠穩後,A股雖然日升日跌,但亦開始穩定落嚟。騰訊(00700)噚日已開始發力,今日再下一城,半日高見375.4元,升逾3%,半日升2.3%,為恒指貢獻64點,暫時騰訊喺375元似有阻力,要喺現水平先行整固。
至於人民幣回升,對人民幣匯價較敏感嘅內房股及內地航空股乘機落鑊,普遍錄得2%或以上升幅。不過阿Man都要提醒一句,反彈歸反彈,博呢兩個板塊反彈都係要小心。好似三桶油咁樣,油價之前挾升,隔晚卻急跌,三桶油今日自然走晒樣,逆市下跌,股價跌0.2%至0.9%,所以呢博反彈都係要步步為營。
藍籌股今日普遍向上,擺都明大戶要挾淡倉,目前恒指升至28600水平,都只不過升抵熊證行貨重貨區第一站,高位28629點仍未向熊證大開殺戒,只要恒指企穩28400點水平,料反彈可持續,進一步挾升至28800-29000水平,至少殺咗呢一批熊證先放手。
除咗內房股跟航空股反彈,物業管理股亦有起色,主要係雅生活(03319)中期業績突出,帶挈一眾物管股受追捧。見大市回勇,資金風險胃納回升,資金暫時撤出公用股,公用股暫時回吐,或者係分段吸納好機會。
另一個表現突出嘅板塊係科技股,小米(01810)得到多間大行發報告唱好,小米半日升5.5%。內地科技股更大部份升停板,港股嘅科技股亦見資金追捧。反正跟住資金走,跟紅頂白,短線跟炒無乜問題,緊記見好要收。
麥狄文
(徐狄怡‧證監會持牌人)