噚日見尾市恒指無啦啦升8點,完埋個收市競價之後就宣布升14點完場,Well,咁對隻恒指Call(21911)嚟講係無補於事嘅,當下定決心要將隻(21911)掉走,輸少當贏之後,心裏面就開始咀咒個市要下行;唔係我黑心呀,正常一個老散心態嚟架咋,你睇吓Forum裏面啲友仔,這邊廂隻Call/Put放走之後,那邊廂就留言用念力吹個市落/上。目的只有一個:就係唔想這邊廂放棄原有策略後,那邊廂個市就自動波按你策略走。
今朝9點20分小妹就當然喺巴士上返緊工啦,見恒指先跌88點;依家10點正,開晒所有報價機同走勢圖出嚟,就見到恒指跌271點,做緊28267點,噚日講嘅10天線(28423點)無咗,就連條20天線(28711點)嘅距離都遠咗,然後發現之前畫嘅「疑似圓底」有少少變形,變咗做一個「三角形」。
再睇埋牛熊證街貨圖,依家10點4分,恒指點數同頭先mark底嘅差唔多,索性用返頭先個口價28267點嚟計數算。上方熊證最貼價嘅係28700至28799點,如果現價起步升532點嘅話,就可以食到呢度嗰124張期指;而重貨區仍然係29000至29099點,呢度有1671張期指,當中有104張係噚日新增嘅。
至於下方牛證,睇圖最貼價就係28300至28399點,呢度有相當於323張期指,不過點數計大家都知道呢一part隨住個市穿咗28300點之後就全數死亡;換言之依家28200至28299點呢度先至係最貼價,而呢度就有257張期指,不過都唔係得返好多架咋,事關依家10點10分,恒指跌幅進一步擴大至跌逾300點,即28200點呢個位分分鐘就會無埋。再要睇就再睇28100至28199點,呢度有相當於303張期指,至於重貨區就仍然係27800至27899點,呢度有1063張期指,用返頭先mark底嘅現價28267點計,即係爭467點就到。
用依家呢個恒指牛熊證街貨圖同走勢圖上嘅「三角形」去睇,爆落嘅機會係高啲嘅,只不過當拆開恒指5分鐘圖之後就見到個市開到10點23分為止,一粒陽燭都未見過,話口未完28200點無埋,入put/熊好明顯依家唔係靚位;入call/牛壓力上亦驚一入即死,呢個時候最好就係去pantry沖杯咖啡醒一醒個人先。
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan