熱門:

2018年7月13日 即巿股評 港股直擊

【輪證贏家】小注恒指Call博圓底

噚日講過中國海洋石油(00883)喺日線圖上形成一個「三角形」出嚟,今日再睇,中海油粒燭仍然喺呢個「三角形」裏面,就由得佢繼續係個觀察名單度先啦。

又再睇返個市,噚日恒指高位一度升穿過條10天線,但可惜最後收市計都係低收於10天線;下晝約5點嘅時候,同事大嗌「嘩!彩虹呀!」然後成班友仔(包括我)拎埋個電話走去落地玻璃係咁影。

雨後天晴見彩虹,可能都講緊恒指今日個市況,早排穿完28000點之後,再用一條倒轉咗嘅彩虹,即係「疑似圓底」向上兜緊。

今朝早恒指開市報28689點,升209點開市;喺開市後頭嗰5分鐘就升到暫時所見嘅高位28715點,呢一吓就將周三(7月11日)個下裂口完全補晒。

開埋恒指牛熊證街貨圖睇,用返頭先mark底嘅28654點計數,上方熊證最貼價嘅係28900至28999點,呢度有相當於427張期指,若然現價向上升345點的話,就可以食到呢一批街貨;再比多100點就發達啦,因為喺29000至29099點呢度有1598張期指,如果大市真係上得到呢個位去食嘅話,同時表示大市將會升穿20天線/保歷加通道中軸,如是者恒指將由保歷加下降通道升返上去保歷加上升通道,「倒轉彩虹」就更加成立。(估架啫!)

再睇埋下方嘅牛證,最貼價嘅係28200至28299點,呢度有相當於85張期指,同樣地用返頭先個現價比度,只係要價露下行454點就可以落到嚟呢度食晒啲貨。用同樣嘅點數去量,上行定下行邊邊值博率高啲?

恒指Call(21911),行使價29088點,屬輕微價外輪,且槓桿同引伸都適中,按一貫入市策略,即吼恒指5分圖見超賣見落場。依家10點35分,恒指5分鐘圖嘅SlowSTC(14,3)由超買回落至中軸水平,等多陣啦。維持小注策略,因為...你依家望出街睇吓個天,噚日有彩虹都唔代表今日會再放晴。

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan#

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads