熱門:

2018年7月12日 港股直擊 即巿股評

【輪證贏家】牛熊證街貨沽清

貫徹我哋條team嘅賭徒性格,噚晚英格蘭VS克羅地亞,下晝又print咗張馬會嘅波膽可買比數出嚟,個個又搵個窿填位,成村人走晒去買英格蘭贏,得三個人買和、一個人買克羅地亞,由於我哋只係計90分鐘關係,結果買1:1嘅同事Thomas贏咗,返到嚟已經見佢揸住張影咗公司部汽水機嘅相話請飲嘢,連同噚日金主Marston買咗嘅一堆零食,哼,睇嚟今日下晝又會成班人圍埋tea time。

噚日恒指一開市大插逾600點之後,跌幅收窄到跌370點收市,或者大家對「貿易戰」呢三個字都有啲麻目,所以個市深插一吓之後就收返上去;至今日恒指開市跌51點,但到依家10點,恒指跌轉升報28352點,升41點。

不過升還升,都係仲未升穿條10天線(28476點)。還記得早幾日畫過個市想生個「圓底」出嚟嗎?依家條10天線就好似嫌我喺小畫家畫嗰條「疑似圓底」唔夠靚,幫我畫緊條curve出嚟,如是者形態就喺度,10天線破唔破都無乜所謂,因為着眼嘅始終喺條20天線(29016點),又即保歷加通道中軸。

依家10點24分,時間關係同事Thomas已經買晒嘢飲請我哋飲啦,真係多謝晒!而恒指依家都升逾100點,做緊28440點,高位暫時見過28462點,果然睇住條10天線上。

上唔上到不如睇吓恒指牛熊證街貨圖,就用頭先mark底嘅28400點計,上方熊證最貼價嘅28300至28399點嗰65張期指已經變成今朝早餐,之後嗰五層10點嘅街貨範圍,作死呀,得28600至28699點呢度有56張期指,其餘係0架,講緊要上到28900至28999點先至有416張期指睇吓,呢個位同現價爭成559點。熊證區真空好明顯係噚日一插啲肥熊四散收工啦!

至於下方牛證,最近嘅係28000至28099點,呢度有190張期指,算叫做有少少人性啦,同現價比嘅話就相差440點,都唔係好得去邊架啦,睇嚟呢期都係比啲時間,等牛熊證街貨圖上面多少少貨先,咁先至可以再睇得清;但如果你自己快手嘅話,用恒指分鐘圖見超買/超賣嚟做trading嘅話亦未嘗不可,但建議小注為上。

題外話,因為個市無咩熱點,搵搵吓就搵咗隻中海油(00883)嚟睇,原來佢做緊個「三角形」,下午續。

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads