|
熱門:

2018年6月19日 港股直擊 即巿股評

【輪證贏家】恒指Put博見250天線

上個星期五(6月15日)喺上下半場裡面各自都有講過恒指波幅指數(VHSI)喺朝早見到嘅水平(15.88)同6月7日(15.9)錄得嘅都係差唔多,亦即係話VHSI好大機會出現一個比較大嘅波幅,甚至可以同6月7日嘅最多跌638點媲美。

依家10點04分,本來打緊句message出個push,作緊句message之際台就響個whatsapp出嚟,話恒指曾跌逾600點,計一計暫時低位係29702點,即最多跌607點,果然拍得住6月7日嘅最多跌638點。

呢一轉跌夠未?怕且都夠住先。先睇恒指日線圖,配條保歷加通道出嚟,今日粒陰燭身體嘅大部份都處於保歷加通道底以外嘅範圍,雖則保歷加通道口同時拓闊,不過要擘大個口包返住粒恒指,很肯定唔會係今日之內發生嘅事;同埋保歷加肯擘大個口之餘,都要恒指瓹返入去先得。

睇埋下方啲技術分析,SlowSTC914,3)%K線同%D線分別做緊17.85同34.23,雖然未到個位數,但再下行嘅空間有限;至於14RSI就見36.02,都屬於跌到落超賣邊皮嘅。值得留意嘅係DMI嘅ADX,由上周三(13日)至今日,ADX數值係9.159>9.467>10.02>11.30(呢粒數截至10點25分止)。各位同學,記唔記得ADX升但市跌,即係代表啲乜呀?唔記得?買本《鐘擺戰策贏港股》睇吓啦!(講笑,打書釘都得架啦!)

再睇恒指牛熊證街貨圖,低位已經變成29639點啦,換言之依家由最貼價嘅30200至302699點開始,落到29700至29799點呢六層牛證街貨全數死亡,夾埋總共有4093張期指,望望月曆今日19號,仲有8個交易日,即係28號就半年期結,怪不得大家都咁落力變身做飛雲打創界山啦!

坦白講,恒指都跌到落咁嘅地田,正如前文純用技術分析去睇嘅話,恒指再下跌嘅空間確實有限,但係諗深一層,就係喺呢段咁短嘅時間裡面,先要係商輪擔提供返啲貼價啲嘅熊證出嚟,買到無雷公咁遠,槓桿都唔會高得去邊啦;更何況同現價唔近嘅話,有咩因由要個市花咁多力氣去上返去咁高嘅水平?餓住上路喎大佬,乾酥餅都無個,死得啦!既然係咁就梗係向下行住先啦,或者行慢啲,事關始終恒指跌咗四個交易日,博反彈嘅聲音都可能開始有,假如個市選擇向下行多兩步,唔貪心,就250天線(29252點),同現價29677點都只係相差425點,恒指Put(16951),行使價29200點,輕微價外且成交活躍,係有少少博再跌嘅成份嘅,所以先至揀輪,小注為上。

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。


電郵:[email protected];Weibo:#Gladyshan

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。