|
熱門:

2018年6月13日 港股直擊 即巿股評

【輪證贏家】飛雲打第四層創界山之牛證重貨區

噚晚睇緊大台套古裝劇時收到台嘅push message:中興通訊(000763)明天周三復牌(即係今日呀);今朝U盤期間再出多個:中興通訊復牌,競價時段叫價跌約40%。戰友Jack都同步whatsapp過嚟:中興-33%(再加個無眼睇嘅emoji公仔),然後就再補多槍「沽沽沽沽沽沽沽沽沽沽沽」哈哈,其實佢呢句「沽沽沽沽沽沽沽沽沽沽沽」我第一時間諗到嘅係白鴿叫,個beat通常只係三個音,而嗰三個音就係「沽沽沽」,若然你係大好友,一大清早起身一心等恒指更上一層樓兼再追升嘅時候,窗外邊隻白鴿就同你講「沽沽沽」,係幾咁令人沮喪。

中興一復牌冧到媽都唔認得,其實對恒指嚟講基本上都無乜大影響,恒指今早開市報30990點,跌113點;依家10點3分,恒指最低做過30912點,仲未插穿條保歷加通道中軸(30878點),所以技術上暫時都叫做「處於歷加上升通道」,只不過係通道底咁解;穿唔穿就要睇吓上定下行有着數啦。

開恒指牛熊證街貨圖睇,依家10點5分,恒指做30948點(mark底先)。下方最貼價嘅牛證就係30900至30999點,呢度有相當於106張期指,按暫時恒指低位30912點計,呢106張期指都所剩無幾。至於上方最貼價嘅熊證就係31300至31399點,呢度就有120張期指,全數都係新貨,但同現價比相差成451點呢。

比較得意嘅係,牛熊各自第四層街貨都有成過千張期指喺度,而對落嗰三層嘅街貨數量都係差唔多,乃念下行較近,其實第一層(即係最貼價嗰層)都幾乎打完咁滯,繼續殺落去又有何不可?今次成班淡友都應該變晒做飛雲,恒指熊(63947),收回價31550點,同現價有逾600點差距,安全得嚟算係街貨少嗰隻;信心爆膨嘅話,恒指熊(67492),收回價31250,距離現貨約300點且街貨低槓桿高,啱短炒用,小注向創界山第四層(牛證第四層重街貨)出發啦!

作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];Weibo:#Gladyshan

放大圖片

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。