|
熱門:

2018年6月12日 即巿股評 港股直擊

【盤房來料】特金會氣氛佳 港股百日線有支持

隔晚美股高位整固,缸邊友屏息以待今日世紀美朝峰會特金會,否會有好消息再推動資本市場,又或者兩名領袖有幾啱傾,所以隔晚缸邊友未有積極入場,令美股表現牛皮。至於港股今日表現反覆,略為低開高走後一度下試100日線(約30988)尋找支持,結果30900點水支不俗,半日港股靠穩微升。恒指略為低開後覆向上,曾升179點,高見31243點半日高位,其後掉頭考驗100日線,低見30945點。其後回穩重返31100水平,中午報收31152點,升88點;國指則升56點,報收12228點。

重磅藍籌股乏善可陳,表現較為突出係三桶油,半日升幅0.6%至2.1%不等,有消息指內地有意推進三大油氣公司將管道資產合併為一家公司,為中國鐵塔油氣版。而新組管道資公司更將尋求上市,公司值將高達3000至5000億元人仔,估計大釋放,三桶油自然炒起。至少油價升勢似乎止步,有機會又進入上落市格局,中資航空股呢期有追捧,南航(01055)升4%創兩個半月新高、國航(00753)則重拾雙位數股身份,半日升3%,東航(00670)升2%今日表現經已係最落後。

除咗三桶油之外,抖咗三兩日嘅醫藥股跟教育股,今日又再度落鑊,醫藥股似乎完成調整回復升勢,唔少教育股更再創新高,升幅閒閒地超過半成,甚至升逾一成。唔少粉絲問阿Man,呢兩個板塊嘅股份仲追唔追得過,講真穿頂就一定唔估頂,但兩個板塊今年已累積唔少升幅,即使最強勁嘅強勢股,都有抖氣嘅時候,寧願等回吐時,又守得穩啲支持位再出手,高追唔係話唔得,咁咪定番個止蝕位嚴格執行再衝鋒。

今日成交仍然薄弱,半日只有472億,噚日港股成交已縮水至自2月15日以嚟最少,得番773億元,記得2月15日當日係年三十晚半日市,全日成交竟然跟半日市相題並論,可見缸邊友都唔多願入場。始終今個星期太多政經大事,今日美朝世紀峰會特金會,進展似乎甚為理想,不過「侵侵」一向難以捉摸,當美國向貿易戰打出第一槍,全世界以為佢係衝住中國而來,誰知一向與其稱兄道弟嘅盟友楓葉國跟歐盟亦無倖免,今日特金會氣氛確係唔錯,但又點知呢位大哥幾時又變臉現乜花臣。

加上嚟緊仲有花旗聯儲局議息、歐央行跟日央行亦議息,三大央行對未來息口路徑嘅提示,將會左右股市去向。花旗今個月加息幾乎已無懸念,至少香港息魔幾時現身仍屬未知數,不過拆息已持續走高,並創下十年新高,原因係花旗再加息,難免令港元再度受壓,近日本地銀行已相繼調高存款利息鬥快搶存款,留意美國議息後會否加大資金流出港元嘅壓力,從而逼使拆息再走高。

港股暫時仍未有方向,上周急升逾千點後,暫時仍然高位整固,可惜係成交未能配合,暫時大市未有動力再爆上,不過呢又未見負面消息拖累,現水平買賣兩閒,估計呢兩日大市仍然窄幅波幅,喺30700至31500點之間上落。提醒大家呢個周五係美國四重期結算,通常結期美股甚少出現方向大逆轉,既然呢期美股升得好哋哋,縱有回吐亦傾向溫和,估計要過埋美股期結,走勢才見較大突破。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。