熱門:

2018年6月8日 即巿股評 港股直擊

【盤房來料】阿根廷獲救紓困 IMF仲可救多幾個?

隔晚美股個別發展,道指跟標指喺石油股支撐下仍有升幅,但納指喺連創續三日創新高後回吐,但港股隔晚亦見回吐,ADR跟夜期均已回落至31500點之下。新興市場危機又升溫,今次輪到巴西揩大鑊,貨幣雷亞爾兌美元逼近4算警戒線,股市應聲急挫逾6%。之前阿Man都講過,對於新興市場貨幣持續貶值,不能掉以輕心,皆因除雷亞爾之外,包括印度盧比、土耳其里拉、阿根廷披索、墨西哥披索、印尼盾等新興市場貨幣今年已經大幅貶值。阿根廷面對貨幣崩潰,剛剛成功向IMF度水500億美元,係IMF有史以嚟批出最大筆常備貸款,為期36個月,暫時免過一場危機。不過新興市場多國貨幣相繼大幅貶值,IMF今次救得阿根廷,下次仲救得邊個,阿Man真係無眼睇。

近日美股升勢,跟港股反彈勢頭強勁,市場仿佛對所有潛在負面因素冇件事,但缸邊友視若無睹,唔代表呢啲問題唔存在,money never sleep,資金流向反映市場風險胃納,某程度上可切實地反映呢啲負面因素,對市場影響已逐步浮現。即使港股連日上升,恒指累計升幅達千七點,噚日阿Man已提醒大家,31500水平已接近移動區間頂部,再高追唔單止無乜肉食,更分分鐘接半棒成大戶點心。雖然熊證重貨區仍有一重注結集喺31600至31700點水平,但大戶未必一定趕盡殺絕,已解釋過係發行商喺高價派發相關產品,既已派晒出街,基本上唔需要再維持秩序,回收與否已唔重要。

睇番今日港股一開波經已下跌77點,開市價31435點已經係半日高位,仲要低開低走,整個上午直插無水花,最多跌417點,低見31094點,半日報收31126點,跌386點。國指則報收12241點,報166點。好友唯一仍可自我安慰係半日成交連500億唔夠,叫做沽壓唔算太嚴重。不過今日呢一跌,恒指噚日見完高位後,已急急腳回補31200嘅上升裂口,咁快回補最近一個上升裂口,唔排除呢個反彈浪已完成,又係時候向下行。反而呢三個月大市都係移動區間上落,29800點至31800點兩千點內行,噚日反彈至31500水平又掉頭,即係級級向下行,落番30000邊唔出奇。

大市插得急,全要係騰訊(00700)昨日反彈至432元又遇阻力回落,講過425元頸線唔企穩兩三日,唔算真突破,今日半場喺無事無幹之下插水2.7%,盤中更曾低見415.4元,半日報收417.6元。話咗騰訊連日反彈遺下幾個上升裂口唔係好事,加上反彈成交一直未配合,阿Man一早判咗佢跟大市一樣,有波幅而冇升幅,一日唔企穩頸線以上,兼且突破埋435元,都唔見得有運行。當然仍有騰訊鐵粉繼續大睇好,阿Man就比較保守,股王已難回復去年王者強勢,今年唔可以再買咗扑暈自己坐貨,要識得睇位炒上落。

繼醫藥股同教育股成為提款機後,今日輪到燃氣股被提款,龍頭中國燃氣(00384)被魔笛追魂,大摩降其評級,股價半日跌逾7%,其他燃氣股普遍跌2%或以上。累積升幅大嘅強勢股,睇嚟半年結要抖氣,反而可留意具世界杯概念嘅波鞋股,龍頭安踏體育(02020)跟李寧(02331),股價今日見回吐,只要守住10日及20日線之上,升勢有餘未盡,可趁調整吸納。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads