雖則上個星期五(6月1日)已經叫做開始咗個6月,但今朝開市恒指裂口升逾300點,先將5月初築起短嘅「下降軌」升穿咗,一彈之下,10、20同50天線(30645點、30755點、30580點)全部都收復番,就唯獨是爭條100天線(30980點)。承如上個星期五喺【輪證贏家】所講,上星期五睇恒指牛熊證街貨圖時,上方最貼價嘅熊證30600至30699點呢度有過千張街貨留守,其實只要恒指un返上去保歷加通道中軸嘅話,就已經可以食得到呢堆重貨熊證。依家9點48分,恒指最低做過30743點,齋計個低位都高位條保歷加通道中軸,30600至30699點又點會有得剩?
咁依家又剩返啲乜呢?截至9點53分止,恒指最高做過30932點,換言之依家恒指最貼嘅街貨就係30900至30999點,而呢度就有787張期指守住,計一計數,今日大戶已經食咗1900張期指落肚,多就唔係話好多,反正都只係月初,仲有時間嘅。至於下方嘅牛證,最貼價嘅就係29900至29999點,而呢度就有844張期指,但同現價(10點2分報30889點)比,要大市無厘頭掉頭下行989點先可以食到呢一批街貨,當然輪商會再出啲貼價啲嘅證比市場去買,假設個市嘅點數無乜非常大變化嘅話,如是者牛證街貨就會同個市近一啲。
依家10點18分,恒指暫時睇呈「十字星」,咁早出現粒「十字星」就無乜用嘅,事關上方30900至30999點嗰787張期指,就等於一舊肉喺獅子嘅嘴邊一樣,恒指牛(60726),收回價29900點,同現價有逾900點差距,(60726)喺同樣的收回價牛證中槓桿最高嘅一隻。一如以往,吼恒指5分鐘圖見超賣先至將隻牛證送落場,小注好啦。
戰友Jack今朝同我講話佢太太(咪就係戰友太太囉)整咗個愛心飯盒比佢帶飯,well,小妹出嚟做嘢咁耐都無飯帶過;不過重點係戰友Jack話呢個飯盒有一少部分係屬於我,因為戰友太太整多一少份比我試,搞到我家吓咩都唔想做,戰友Jack,你叮飯記得話我知呀!哈哈!多謝戰友太太;然後隔離team拔爺請我食泰國買返嚟嘅紫菜。
作者阿珊,從事財經及投資版報道超過10年,由平面媒體走到網絡世界,《鐘擺戰策贏港股》作者。相信技術分析,由窩輪到牛熊證無一不炒,唔貪心,志在搵餐下午茶。
電郵:[email protected];微博#Gladyshan