熱門:

2018年3月23日 港股直擊 即巿股評

【盤房來料】大市暫守三萬宜觀望

嘭一聲,特朗普打響貿易戰第二槍,之前徵收鋼鐵關稅用水槍,純擺姿態博其他國家搵佢講數,然後再向美帝俯首稱臣。不過第二槍就打真軍,槍口對準中國呢個目標,向中國進口產品開徵巨額懲罰關稅,涉及產品總值將高達600億美元(約4680億港元),以報復中國涉嫌竊取美國知識產權。侵侵明刀明槍侷住中國接招,阿爺又豈會退讓,尤其習大霸氣唔輸蝕得過侵侵,今日中國商務部周五宣布計劃對自美國進口的30億美元商品加徵關稅。

雖然阿爺不甘示弱即時還拖,但商務部亦呼籲,中美作為世界前兩大經濟體,合作是兩國唯一正確的選擇,希望雙方從中美大局出發,透過對話協商解決雙方的分歧,避免對中美合作大局造成損害。同時中國亦表示,雖然唔多想打貿易戰,但亦唔怕打到嚟,既然花旗要開拖,中國當然還拖。更明言有人想玩大佢的話,中國必奉陪到底,即管睇吓邊個可以撐到尾。

侵侵呢一槍打得響亮,但亦禍及全球股市,隔晚歐美股市反晒艇,港股今早亦玩大裂口,恒指低開1140點,報29930,即見今朝位,噚日已失多條移動平均線,今日連100日線(30374)亦失守,幸而三萬大關總算失而復得。開市後跌幅收窄,盤中曾見30320點半日高位,中午報收30199點,跌872點;國指報跌358點,報收12069點。撇除騰訊800億批股,半日成交亦逾千億元,大成交下跌,但唔少股份從低位反彈,反映30000點水平有一定承接力。

除咗貿易戰拖累港股,另一重創原因係騰訊(00700)大股東減持,不過QQ低開405元又係全日低位,半日跌4.5%,報收419.6元,守住批股價之上。由於今次批股接貨嘅全屬機構投資者同基金,而呢1.9億股亦有180日禁售期,即係市場唔會突然多咗貨供應,騰訊今日逼近二月份低位,即400元水平,係一個吸納好機會。不過股價中午收市已重返420元附近,又再接近425元短線阻力,410元樓下未有撈貨已失先機,現水平宜再觀望。

至於其他重磅股,AO價大多數係全日低位,目前大部份重磅股算係喘定,不過貿易戰發展太多變數,阿Man認為港股唔上100日線再靠穩,仍有機會再向下尋底。今日一跌,港股一次過回補所有上升裂口之餘,今日又再遺下另一巨型下跌裂口,裂口太多令前路崎嶇,加上今日係周末前夕,未知周末期間中美雙方會friend番,抑或打多餐,建議謀定而後動,入場撈貨未宜進取,縱使30000邊有一定值博率,但亦只限小注怡情。

眾安重回上市價可留意

眾安在綫(06060)公布業績後股價直瀉,反而今日大跌市,其股價再創58.05元上市新低後,似乎喘定,雖然集團今年業績見紅,但喺現水平似乎有一定值博率,皆因已打回原形,重返59.7元招股價以下水平。集團今次業績見紅,主要係撥備金提升,令盈利水平有短期影響。而呢撥備,主要係因為有規定對未滿期保單提存保留準備金,因此產生精算角度虧損。其實準備金同時反映未來保費收入嘅指標,喺保單期滿時呢筆撥備亦會被重新釋放。展望未來眾安有三大增長引擎,包括健康、消費金融及汽車保險。而公司保費持續錄得增長。2018年1月及2月總保費收入,約為13.41億元人民幣,較去年同期大幅增長119%,踏入2018年集團嘅總保費收入,同比增速將進一加快。既然現價已接近招股價,又回復至合理水平,待整體市況喘定,值得留意。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads