熱門:

2018年2月21日 即巿股評 港股直擊

【盤房來料】半新股過夜無謂 有食即食最實際

隔晚美股因為債息回升而下跌,道指更跌逾1%,主要係重磅股沃爾瑪業績不似預期,股價急挫一成,創三十年以嚟最大單日跌幅,拖累道指顯著下跌,其餘兩指數只係微調。至於港股唔多受美股影響,隔晚黑期跟ADR表現都唔錯,今日港股順理成章做好。

噚日港股喺狗年首個交易日係紅盤高開,可惜最終「熊盤倒跌」收市,恒指挫逾二百點,幸而今日重拾動力,恒指今早高開176點,雖然曾低見30886點,幾乎抹去開市升幅,但50日線(30787)支持力已加強,早段一度升至31257點,升383點,中午收市報31153點,我279點;國指則升175點,報收12572點。

噚日港股午後急回,主要係大笨象(00005)業績稍遜預期,但呢一個都唔係導致股價急跌3%嘅理由,主要係集團未有公布新一輪回購計劃,加上業績前股價早已偷步炒上,短炒獲利沽壓湧現,令股價受壓,幸而80元仲守得住,今日回升近1%。至於恒生(00011)噚日跌得更無辜,業績好過預期,派息亦見增加,又係業績前股價已急升,沽開大笨象嘅炒家,幫手踩一腳,令其股價跌穿190元,不過今日已回升1.2%,半日報收191.5元,維持強勢。嚟緊下星期三公布業績嘅港交所(00388),今日亦回升近1%,股價重上280元;騰訊(00700)更升至兩星期高位,半日升1.3%,報收451.6元。

油價隔晚升至近日高位,帶動「三桶油」做好,股價升1.1%至1.9%不等。至於內銀同內險股今日反彈,亦係今日升市功臣,始終阿Man今年都睇好中資金融股呢個板塊,之前撈咗平貨坐定定,未有貨則吼回調上車。唔少粉絲問阿Man,內房股仲值唔值得吸納,講真阿Man今年本來就唔多睇好呢個板塊,肯定今年不如往年風光,再加上唔少內房股都已向市場抽手,連股都批埋,試問仲有乜嘢理由支持股價再炒高,即使大市已從低位反彈逾2000點,但已抽水嘅內房股反彈力疲弱,其他內房股表現亦平平,有子彈都留番掃多幾手港交所博下周炒業績好過。

假期前已開始掀起半新股炒風,半新股持續落鑊,噚日已見異動嘅希瑪眼科(03309)一度升逾一成,半日升3.5%,阿Man始終認為希瑪現價估值已過高,純綷跟風炒作,但要重返上市高位20元,確係有難度。彌明生活百貨(08473)股價波動,半日曾升37%創上市新高,但創仔阿Man向來有戒心,即使唔係有人圍飛作歹,亦容易被人操控,眼看手勿動,企埋一邊食花生。其他異動半新股包括守益控股(02227) 創新高,半日升13.4%;龍昇(06829)急升22.7%;靛藍星(08373)升17.8%;LHN(01730)反彈15.6%。對於呢堆新股,唔反對跟風炒作,對急上急落最好炒Day trade,輸贏即日計數,今日天堂,明日唔知會唔會去地獄,過夜無謂,即食最實際。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads