噚日話灣仔沙中線個地盤又有炸彈，警方疏散附近嘅人，我想講其實由我公司行去嗰地盤都只係10至15分鐘嘅路程(可能可以再快啲，只係我矮>腳短行得慢)，點解疏唔到我哋呢邊呢？(說穿了就係博有得早走)
灣仔個炸彈就有警方嘅拆彈專家慢慢拆；咁呢個升到開始有大行同股評人講話會回調嘅港股，隻彈又邊個嚟拆？講真，可能好多人根本就唔想拆，事關一拆嘅話，手上嘅貨同化為烏有無乜分別，順便又似係一個合理嘅說法去解釋噚日恒指出現單日轉向，噚日隻恒指熊(61386)幾乎命喪，策略上仍然採恒指5分鐘圖見超買時落場，而係朝早約11點半開始，至下半場1點5分到，恒指5分鐘圖SlowSTC(14,3)都keep住係超買，(61386)大把時間落場。Day trade嚟講，喺同日下晝1點35分同埋2點25分恒指5分鐘圖SlowSTC(14,3)由超買變超賣，(61386)已經完成咗佢嘅使命，以落場時段嘅高低位0.047同0.032拉個平均數，0.0395當作為買入價，再以出貨時段嘅高低位0.066同0.051嘅平均數0.0585作為賣出價，計落都有48%水位喎；就算斬頭斬尾計，點都有兩成掛。不過，若然揸過夜嘅話，由於(61386)收回價係33000點，今朝恒指開市已經報32950點，話就話一開市chok得高之後會因技術指標升得過火而下行，但中間仲有個step就係跑多兩步先識停，就好似跑步運動員咁，衝咗線之後唔係話停就停，個人點都會再向前跑多兩步；開市價32950點同收回價33000點只係爭50點，唔駛講都得兩個結果啫，都話堅持、唔好放棄係睇情況架啦！
依家10點29分，恒指開始倒跌，但都係跌2點咁大把，今日10天線(32766點)暫時變咗做支持，噚日升到係威係勢嘅股份依家見紅；而噚日跌到仆直嘅內房今日就有中海外(00688)同潤地(01109)破位。依家恒指做緊32875點，就用呢口價計數，上方最貼價嘅熊證33000至33099點未死晒嘅，事關恒指最高暫時做過33048點啫，將街貨圖拆細啲，以50點一個範圍去睇，33000至33049點(個1點就由得佢啦)有相當於736張期指，叫做係第二重貨區架啦，如今無咗，變相33050至33099點呢度就係最貼價嘅熊證，有相當於103張期指；至於熊證重貨區講緊係33500至33549點，呢度有1397張期指，同現價比就爭674點，計晒沿路嘅街貨，total有2647張期指。
下方牛證最貼價嘅係32300至32399點，呢度有相當於197張期指，現價計就有575點嘅距離，若然再落多100點嘅話，即32200至32299點，呢度有1090張期指，夾埋上面嘅total有1287張期指。
留意返，兩邊嚟計要行嘅點數差唔多嘅情況之下，上行可以食到嘅期指張數好明顯係比下行嘅多成倍，配埋個月曆睇，業績期即將殺到，大市借靚業績再上多浸都唔奇。恒指Call(21423)，行使價33600點，輕微價外兼成交活躍，希望幫補吓今晚同我老媽慶祝生日食飯餐飯錢啦。
老媽，生日快樂！(其實你一啲都唔老，我都仲未可以填你個名落張報稅表度)
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
