熱門:

2018年1月19日 即巿股評 港股直擊

【盤房來料】周末前夕港股高位整固

美股創新高後,隔晚回調但對港股影響有限,雖然早段曾跌穿32000水平,但其後拗腰倒升,目前喺高位整固。恒指高開20點,升至32186點後回頭,一度倒跌135點,低見31986點半日低位。不過32000點有支持,半日最多升81點,高見32204點。恒指半日報收32154點,升32點;國企指數報13142點,升47點。

幾隻重磅股個別發展,騰訊(00700)回升,目前守喺450元樓上,但若然午後升幅未能擴大,今日又收陰燭,再破頂前表現較為反覆。至於港交所(00388)亦係破新高前抖抖,由於300元未能企穩,估計暫時喺290元至300元之間上落。平保(02318)近日一直跑贏,今日雖然上半場仍輕微上升,由82元起步已升逾10元,升幅超過一成,需要整固先有力再上。而一向慢吞吞嘅大笨象(00005),繼續行三步褪兩步,上半場跌0.35元,暫時守住85元水平,一旦85元失守,有機會再向下試84元水平。

中資金融股今日抖抖,又輪到內需股跟內房股發力。阿Man一向睇好今年內需股表現,蒙牛(02319)跟旺旺(00151)分別升2.1%及1.6%。內房股未受近日抽水潮影響,華潤置地(01109)急升6.6%,成為表現最佳藍籌;中國海外(00688)高見30.1元,半日則近4%;碧桂園(02007)批股後,大行認為並冇負面影響,股價回升3.6%。二線內房股升勢更凌厲,阿Man愛股創12.88元新高,半日升7.4%,報收12.44元。奧園(03883)跟龍光地產(03380)分別升12.6及9%。

講真內房股一升再升,連阿Man都跌晒眼鏡,明明阿爺打壓樓市未見手軟,偏偏內房股銷售數字一再創高位,帶動資金繼續吸納,追貨定唔追,真係冇意見,有貨可以繼續持有,走勢一日未扭轉唔使走。但冇貨高追唔建議,只怕內房股輪流抽水。不過細摩畀咗貼士,指世房(00813)、潤地、合景泰富(01813)及富力地產(02777),配股機會低,要買都係留意唔抽水股。

今日已屆周末前夕,港股喺呢個星期已近千點,今日再爆升機會唔大,預期喺32000點之上整固,留力下周再挑戰新高,既然短炒值博率唔高,不如happy Friday,提早收工。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads