美股繼續喪升,三大指數又破頂,道指更急升逾三百點,企穩26000大關之上,港股當然繼續其尋頂之旅。恒指高開165點,開市後升幅擴大,半日曾高見32234,再創歷史新高。其後升幅收窄,約11點半走勢逆轉,曾倒跌23點,見31959點半日低,剛好回補開市上升裂口,恒指半日報32021點,升38點;但國企指數報12744點,跌42點。
恒指創新高,四大重磅股王當然有表現,騰訊(00700)曾見454元新高,可惜未能企穩450元,半日倒跌0.8元,報收448.2元。至於港交所(00388)亦高見301元,創歷史新高,半日報收297.8元,升2.2元。港交所今年大升有根有據,昨日阿Man喺信報專欄<<金融街密語>>指出今年如能成功爭取沙地阿美落戶香港,再加埋一堆新經濟股上市,今年IPO集資額可高見萬億元,呢條數咁計,港交所330元目標係太保守,400元並非信口開河,要變啡底股亦非無可能。平保(02318)一句分拆陸金所,股價一升再升,其實平保可以分拆又豈止陸金所,旗下瓣數多,紅底股已無懸念,問題係紅底之後仲可以行得幾遠。要數最落後係大笨象(00005),暫時離歷史高位103元仲有段距離,不過今年加息大笨象定能受惠,只要有耐性,點都可以舊地重遊。
四大股王上半場未算盡全力,大市又要靠內銀股支撐,唔少缸邊友見內銀股呢期愈升愈急,持貨超過十年嘅蟹貨開始鬆綁,都急不及待想甩身。其實內銀股現價估值仍合理,甚至有啲偏低,若然閣下真係2007年高追,捱過十年等到見家鄉,唔係平手或贏粒糖走人,一於繼續持有,揸翻呢場狂牛入場券。
今日輪到鐵建股落鑊,唔少缸邊友都有貨,等了又等今日終於等到,阿Man講過大牛市逐個板塊輪動,只要有概念,係大價股都啱北水口味,中交建(01800)創近兩個半月高,半日升3.73%,為表現最好國指成份股。另外,中國中鐵(00390)及中國鐵建(01186)分別升3.36%及2.8%。
雖然阿Man最最最憎券商股,但A股有翻生跡象,而港股成交持續暢旺,券商股升係好合理,要揀券商股,一定係內地券商秤先,講過好多次,北水已完全獲得港股話語權,即係內地券商高人一等,要揀一定揀話定事嗰批,本地券商股最多掹車邊跟上,論賺錢能力,肯定係內地券商勝一等。
希瑪眼科(03309)阿Man撤底投降,完全無諗過可以炒到呢啲位,今年新股排住隊上市,錯過希瑪嘅缸邊友,唯有等下一個機會,升咗五倍嘅希瑪,都係食住花生睇佢上落算啦!
麥狄文
(徐狄怡‧證監會持牌人)