本來諗住臨收市入隻恒指牛(67236)，博今朝早開市會高開一下閃人。噚日收市前一個鐘到都開始望住個市有咩變化，結果最後都係見到同朝早個高位咁上下，於是就小注入隻(67236)；今朝早喺地鐵時見到開市微跌2點，開報31009點都仲不以為意，返到公司放低個袋開電視見到個市紅多咗就有啲驚驚地，再開恒指5分鐘圖睇，見到恒指落到500分鐘線(5 x 100線，9點55分報30938點)似乎有支持，雖則今朝開市個樣不似噚日預期，但抱住「開市跌會拖底技術指標至超賣，到時觸底反彈再走Call/牛證，輸都無咁入肉」嘅心態，硬住頭皮去等，最後見到恒指慢慢向上行，係10點10分至15分，返番去今朝開市時附近位置，過多5分鐘見恒指上行嘅走勢未有異樣，但同時見5分鐘SlowSTC(14,3)出現超買，(67236)都係走為上著。
依家10點48分，恒指高位暫見31095點，同恒指歷史高位31958點相差863點，講真，863點對於要創歷史新高嚟講唔係話一個天方夜譚嘅數字，但點都需要啲理由同勇氣嘅。
開恒指牛熊證街貨圖睇，坊間大部份恒指牛熊證街貨圖都係顯示同現價有1000點差距嘅牛熊證街貨，換言之傳說中嘅31958點，即係踩住31900至31999點呢度已經係恒指牛熊證圖上可以見到，暫時呢個位置就係同現價距離最遠嘅一層，對大好友嚟講，太陽同海王星嘅距離就連人類都可以探索得到，相比之下區區呢個10個100點嘅距離又有咩難度。
啱呀，按依家10點52分恒指最高做過31105點嚟計，最貼價嘅31000至31099點個116張期指好明顯已經做咗早餐，亦即係話31100至31199點呢度成為最貼價嘅街貨，大市嘅一小步，變成大好友嘅一大步，如是者殺走一個熊證範圍嘅話，即表示同31958點嘅距離又近咗啦。雖然呢度得393張期指，若然大市真係keep住「超買再超買」上行嘅話，唔排除同一時間會有更多人(或者更多錢)入熊博大市已經到頂要下行(唔大跌都要回調啦)，如是者熊證貨量可能變得愈來愈多；係一個「死都要破頂」嘅氣勢前題之下，愈多熊證就愈刺激(或者比借口)個市向上，即使每日嘅波幅唔多，但keep住係咁上嘅話，嗰啲「連升1x日」已經變成一種催化劑啦。嘗試用多次噚日個策略，臨收市捉隻遠價少少嘅牛證，博第二日再「大市一少步」咁上行。
作者阿珊，從事財經及投資版報道超過10年，由平面媒體走到網絡世界。相信技術分析，由窩輪到牛熊證無一不炒，唔貪心，志在搵餐下午茶。
