熱門:

2018年1月2日 即巿股評 港股直擊

【盤房來料】2018紅盤高開高走好兆頭

2018年首個交易日,港股紅盤高開高走,輕易突破前高位30199點,半日進賬500點,今年開局有個好開始。恒指開市報30028點,其後扶搖直上,盤中曾高見30446點,最多升527點。恒指中午報收30421點,升502點;國指表現更強勁,升326點,報收12035點,跑贏大市。今日港股升市嚟得較為實在,唔似得假期前欠缺成交配合,半日成交額接近700億元,今日都幾肯定成交額可以重越千億。

內地首日實施定向降準,確令市場銀根稍鬆,A股亦錄得1%升幅,內銀股表現出色。阿Man自上月美國落實加息後,已表示加息周期開始,金融股最受惠,而內銀股更受惠今年開始實施定向降準,升勢更為凌厲。建行(00939)及工行(01398)分別升2.6%%及2.7%,整個內銀股板塊跑贏市。

至於幾隻大市火車頭,包括騰訊(00700)及平保(02318),前者升2.5%至一個月高位,報收416.4元;阿Man假期前已推介港交所(00388),指港交所現價估值唔算高,只要今年成交額有所增長,再加埋放寛同股不同權,可吸引更多新經濟企業來港上市,港交所水漲船高,今年大有機會重返2015年高位,即接近300元水平。今日股價最高見249.4元,逼近250元大關,半日報收248.6元,有望突破之前高位。

本來阿Man唔多睇好內房股今年表現,偏偏內房股升完再升,更有唔少股份創新高,包括藍籌股碧桂園(02007),半日升7.2%,報收15.98元,盤中曾創16.38元歷史新高。除碧桂園外,另一阿Man愛股合景泰富(01813)亦創新高,其他內房股閒閒地錄得3%之上升幅。

聖誔假後曾表示,基建及鐵路股在今年仍是受惠政策嘅股份,喺阿爺維持經濟增長之下,基建鐵路項目全速上馬,相關板塊定能受惠。中車(01766)創近兩年高,半日升3.2%;中車時代(03898)1.2%;中交建(01800)升2.1%;中鐵(00390)升2.9%;中鐵建(01186)升3.3%。

雖然濠賭股12月份博彩收入按月下跌,按年升幅亦遜市場預期,令整個板塊捱沽,但預期今年全年濠賭股收入有增無減,回吐又提供吸納機會。至於汽車股愈戰愈勇,大行仍睇好行業今年前景,阿Man今年亦繼續睇好呢個板塊,
港股既然能升破11月份高位,暫時唔好懶醒估頂,加上今日升市有成交配合,短線要做嘅係搵位加倉同買貨,而唔係逆市走去做淡友。雖然有缸邊友擔心美股一旦回調,或拖累港股腳軟,但大家要緊記,港股話語權已落入北水手中,只要A股生生性性,北水繼續支持撐港股,除非美股出現股災式跳樓下跌,一般調整震盪,港股亦唔會有乜大礙。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads