|
熱門:

2017年12月8日 即巿股評 港股直擊

【盤房來料】長毛50股已無翻身機會

美股係強到你唔信,雖然侵侵喺中東點著火頭,又話要誅殺金仔,兼且今晚又話政府莫財,隨時暫停運作,但係美股調整咗兩三日,隔晚又回升,帶動港股今日再反彈。

港股噚日一度下試100日線,成功尋找支持後,今日承接外圍股市回升高開,恒指高開96點後,雖然曾收窄升幅低見28344點,其後愈戰愈勇,愈彈愈高,半日收市前最多升274點,高見28578點,中午報收28550點;國指升127點,報收11278點,少咗阿爺阻頭阻勢,係彈得輕鬆啲,唔似得噚日A股死死吓,搞到港股彈唔起。其實阿Man都講過,恒指牛證周三被殺得七七八八,大戶基本上開咗大餐,嚴重超賣下反彈好正常。

重磅股普遍反彈,騰訊(00700)劏完一大批肥牛,終於識得反彈,今日再升2.6%,報收388.4元,短線反彈阻力喺392元,反彈期望勿過高。至於其他科技股有龍頭大哥射住,跌咗咁多梗要彈,瑞聲(02018)曾升7.6%,半日升5.7%;舜宇(02382)曾升5.8%,半日升4%。其他科技股亦錄得不俗反彈升幅,不過睇番之前急跌嘅累積跌幅,今日反彈相對濕濕碎。同樣道理,內房股一樣反彈,但反彈幅度同樣比較累積跌幅係碎料。

港股反彈可以去到幾多無人知,但阿Man相信依家只係反彈,而唔係見底回升,大市一日唔企穩喺50日線(約28750)再築底,要再破頂唔容易。反而今次反彈唔升穿50日線的話,仍然會再之回落,問題係100日(約28150)已有支持,抑或再插深啲。最重要係大戶喺28800點樓上計數離場,又點會喺同一水平再入場,至少等到下個月踏入新一年度先再開倉。加上下星期美國議息,一旦港元隨後加息,大戶要有藉口再開殺戒。

唔少粉絲問阿Man,若然大市要整固或再調整,二三線股仔仲有冇機會落吓鑊,話晒2017年全年無佢哋份,下個升浪點到輪到股仔玩。阿Man可以好肯定咁答大家,自今年中『粉塵爆炸』後,已經判咗啲股仔死刑,監管機構對相關股份窮追猛打,吓吓出動紅牌趕出場,更甚者直情DQ公司強制除牌。再加埋噚日發生康宏(01019)集團高層被ICAC拘捕一事,即係監管機構已掌握佢哋口中嘅邪惡集團嘅犯罪證據,並已轉介執法機構做嘢,咁嘅環境同氣氛之下,個個莊家都怕槍打出頭鳥,仲邊會夠膽入場炒股仔。若然仲有股仔持倉,都係早日分手,唔好再望之後會有機會翻身。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。