|
熱門:

2017年12月8日 即巿股評 港股直擊

【輪證贏家】恒指「下降道通」仍健在

噚日恒指確實喺條100天線上面搵支持,搵咗成日終於都被佢諗點係條100天線上面企住先,反正此前嘅所有恒指熊都全數收割晒;再加上噚日嘅策略只係持盈保泰,所以個市點行都好,none of my business。不過,噚日喺財經新聞嘅焦點都唔係恒指守穩100天線,而係老廉+SFC會聯合行動,呢鑊仲唔係真實版《廉政行動2017》?花生含量極高,不過做財經新聞嘅同事就辛苦晒啦!今朝再嚟多單隆成,煲劇都無咁攰呀!

返到公司開電視同電腦,一睇見到前輩湯文亮上咗嚟做TV同FB嘅live,呢期湯博士講樓又講市,我睇佢啲稿都打醒十二分精神。開大電視機條聲(平時公司個電視機係啞架!)再開住個恒指走勢圖睇,日線圖上100天線(28141點)果然有支持,今日粒細小嘅陽燭向上彈起咗啲啲,同步SlowSTC(14,3)嘅%K線(7.976)低位升穿%D線(7.115),14RSI亦由噚日嘅36.412回升至暫時(10點10分止)嘅40.28;轉條保歷加通道睇,噚日同前日(星期三,12月6日)恒指插穿過保歷加通道底部,今日粒燭彈高少少變相回返入保歷加通道裡面運行,符合咗保歷加通道穿底反彈嘅原則;不過,恒指條「下降道通」仍然未被破壞。

依家10點17分,恒指報28482點,開返恒指牛熊證街貨圖睇,牛證最貼價嘅就係28100至28199點,呢度有相當於485張期指,然而恒指呢兩日回返少少上去,所以個距離無之前嘅咁貼,恒指現價要向下行多382點先可以食得到最貼價嗰堆牛證嘅街貨;再向下數多100點嘅話,即係28000至28099點,呢度仍然都係牛證重貨區,有相當於1133張期指,呢啲齊整點數關口位果然係大家守關至愛。

向上望熊證都開始有番啲生氣,最貼價嘅熊證喺29100至29199點,呢度有相當於765張期指,同現價比嘅話就有717點距離,暫時都未可以同牛證又近又多貨嘅距離做比較。

如果用恒指牛熊證街貨圖嚟秤嘅話,恒指熊係要standby,不過你見啲技術指標向上中,唔排除會升到「下降通道」頂,剛好與50天線(28751點)相若。或者淡友們可以等一陣;貪心鬼想食呢300零點嘅話,你可以揀隻貼價、高槓桿嘅恒指牛嘅;不過今日星期五,Happy Friday算吧啦!

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。