|
熱門:

2017年9月14日 港股直擊 即巿股評

【輪證贏家】恒指就到「雙頂」頸線

恒指再呈高開低收格局,不過呢個過程基本上比一個朝早多啲嘅時間佢就已經做完,下半場大部分時間都只係打橫行,移動速度同動作真係同隻樹懶無分別;好彩見恒指5分鐘圖上SlowSTC(14,3)由11點10至下晝1點25分都keep住超買,都算係恒指熊(67279)一個落場嘅好時機。

今朝早開市恒指再見跌勢,個疑似「雙頂」愈嚟愈似樣,恒指開市先跌105點,報27789點,(67279)快手嘅10格8格都有落袋;即使手腳慢都唔緊要,事關係10點16分,恒指再見跌勢,5分鐘圖見恒指當下呢粒陰燭長到有我手指尾第一節嘅一半咁長,劍指牛證方向,直搗黃龍咁款。唔貪心嘅話(67279)呢個時候亦係第二次收網嘅時機。

咁插法除咗個疑似「雙頂」湊效外,唔通牛證街貨量十足?一開先知原來最貼價嘅喺27700至27799點,呢度有相當於586張期指,按依家10點21分計,恒指暫時最低做過27767點,即係話已經順利踩入呢個範圍,586張期指應該都有一部分被大戶食咗。再數落去,其實對落兩個100點範圍,即係27600至27699點,同埋27500至27599點,呢度分別只有341同117張期指,望上去好似不值一提咁,但按依家恒指以樹懶mode去行嘅話,今日睇呢兩個位無乜貨啫,難保聽日睇嘅時候原來多咗錢追貼價牛嘅話,咁唔重都變重啦,分分鐘聽日一開市又殺埋呢兩個位,咁同重貨區27300至27399點又邁進一步啦。

上方熊證又點呢…最貼價嘅係28000至28099點,呢度有相當於100張期指;重貨嚟講就係第三貼價位,即係28200至28299點,有1040張期指啦,同現價計嘅話…算啦,計都慳返,反正恒指都踩咗入牛證範圍囉,係咪?

又畫多次個「雙頂」出嚟,咦?好似就嚟到「雙頂」頸線咁喎,短線就更係吼住條頸線啦,恒指熊(69279),收回價28200點,50倍槓桿夠刺激,講明短線嘛,靠高槓桿嚟拉高個賺幅囉。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。