|
熱門:

2017年8月11日 港股直擊 即巿股評

【盤房來料】有心理準備調整最深可至26000

延續噚日大市跌勢,加上隔晚歐美股市仆直,港股今日繼續顯著調整。「金金」同「浸浸」口水戰升級,金仔講到要向關島發炮,浸浸當然火滾,表明會還拖,仲可考慮到不惜一切代價,甚至連核武都要出埋,核武喎,容乜易一鑊熟,各地股市當然嚇到騰騰震。

隔晚美股跌幅顯著,尤其納指隔晚跌幅超過2%,科技股大部份反艇,港股ADR亦全軍盡墨。今早恒指裂口低開433點,即見26999點,20日線(約27155)失守後死貓彈咗一吓,見過27184點半日高位。但其後沽壓轉強,跌幅擴大至最多542點,見26901點半日低位,中午收報26926點,跌517點;國企指數報10566點,跌215點。恒指失守27000點,暫時支持位下移至26800點,再失守的話當然有機會直指50日線(約26344),阿Man認為二萬六點係相當大支持,未行到二萬六,怕且北水已仆倒出嚟掃貨。

講過無數次,阿Man仍相信今年高位未見,一次較有深度嘅調整,更有利後市走更遠。上個月阿Man已有晒準備要回調,及至上星期進一步上升,透支大市上升動力,已警告恒指呢鋪行到27800要回頭,呢兩日急跌近千點,調整速度咁快,波幅料擴大,呢鋪可能再調深些少。不過阿Man真係未驚過,對上2007年嘅大牛市,就曾經喺8月出現大型震倉後,先發展到其後32000點嘅瘋牛市。當年8月高低位3000點,月初23018點,月內曾見24089點,月內低點係19386點,月尾報收23984點,高低位超過4000點。雖然今次未必會有樣學樣玩咁大波幅,但已有心理準備最深插到落26000點,一日唔穿25500點,整個大升浪仍未結束。

大市半日成交額已達762億元,其中騰訊(00700)成交額高達108億元,已佔去半日成交額15%。睇番騰訊成交分布,上半場活躍嘅大戶,沽貨嘅都係美資為主,而接貨嘅主要係中資,其實主動買盤同沽盤比例接近,嚟到10日線樓下,已有資金願意接貨博下星期三業績。阿Man則建議想加碼或者上車嘅缸邊友,周末前都係忍一忍手,若然大市進一步調整,騰訊有可能落到20日線,即係308元水平,不如等到星期一過咗周末再決定。

科網龍頭騰訊都頂唔住,其他科網軟件股向下,美圖(01357)跌3.3%;IGG(00799)和金山軟件(03888)挫約5.5%;網龍(00777)跌2.2%;金蝶(00268)跌3.1%。手機零件股方面,丘鈦科技(01478)跟高偉電子(01415)都係派咗份靚仔成績表,不過前者獲大行祝福調高目標價,今早先跌後升再創新高14.88元,目前仍企穩14元,半日升6.5%。但高偉則見光死,半日急挫16.4%。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。