|
熱門:

2017年8月11日 港股直擊 即巿股評

【輪證贏家】庖生,請坐

真係好耐都未見個市跌接近500點,按策略嘅話恒指熊(69242)一早就揀定咗出嚟,不過恒指5分鐘圖上要等到下半場先到見超買(即係預設入市位),確係蚊瞓;明白嘅,但若然你真係按照策略做嘅話,即噚日下晝點半時入(69242),坐過夜到今日,相信今朝早市都未開時,睇新聞見到隔晚道指同ADR見紅嘅時候,你份早餐就算食碗皮蛋瘦肉粥都覺得甜到爆。

U盤就梗係喺坐地鐵返工嘅時候睇架啦,未完之前戰友Jack報價隻騰訊(00700)跌緊16.2元,企鵝咁樣被人隊,港股又點好意思無事發生呢,擺明今日恒指請咗庖生出嚟坐鎮,Who is 庖生?庖丁呀,解牛不傷刀嗰位仁兄呀,今日開市啲牛仲唔係被佢解晒?(其實依家DSE仲有無《庖丁解牛》呢課書?我會考年代的所以唔知)

恒指開市裂口下挫都真係預期,誰不知戰友Jack再Whatsapp一句:「27000.43」,嘩,辛苦晒,用0.43點嚟頂住27000點啲牛仔,仲要開市時因為大裂口下挫關係所以抽返上少少,收回價27000點嘅牛仔都仲可以趁呢個空檔走人;認真,千祈唔好執包伏啦,再執就伏架啦,事關喺開市頭一分鐘之內同時出現低位係26999點,呢吓一點穿心同阿譚倩紅喺《逃學威龍2》篤一篤周星馳HiFi咁,「正話篤走左我億五啦已經!」

依家10點23分,恒指keep住喺27000至27100點游走,雖然技術上恒指仍未穿由今年初至依家嘅「上升通道」(底部約26034點),不過日線圖上見恒指裂口低開穿埋條20天線(27164點);大家都知道條20天線又等同保歷加通道中軸,喺啲MACD同SlowSTC(14,3)都中係傾向超買,得14RSI接近中軸水平(現報53.676),喺技術分析未有明確指引吓,睇埋恒指牛熊證街貨圖。

依家10點33分,恒指現價27108點,最低做過26999點,換言之牛證區嚟講,今朝由27299點開始食到落到27000點,2398張期指好似巨人咁,擘大個口然後放入去,搞掂;最貼價嘅牛證就變成26900至26999點,呢度有相當於455張期指,再落多100點,即係26800至26899點見到係重貨區,但都只係得630張期指。若然有錢打算趁跌勢博反彈嘅話,貪心鬼揀200點距離取其高槓桿,哼,咁就死得人多。事關上方熊證最貼價喺27800至27899點,呢度有50張期指;再上多兩層嘅100點,即係27900點至27999點同28000至28099點,呢度分別有899同1011張期指,係就係重貨,但同現價相差成千點呢,換着我係個市,今日食咗2000幾張期指係滯咗少少嘅,飲完杯普洱消滯,咪又再食過,恒指熊(67268),收回價27900點,貪其成交活躍證價細。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。