|
熱門:

2017年7月18日 即巿股評 港股直擊

【輪證贏家】恒指現疑似「圓頂」

噚日晨早恒指火速補完個裂口之後就兜返向上行,恒指牛(65572)等到下半場2點30分至55分,恒指5分鐘圖SlowSTC(14,3)出現超賣,(66572)如是者就落咗場。不過等到臨完場前5分鐘,恒指5分鐘圖SlowSTC(14,3)由超賣變超買,但問題同噚日一樣:SlowSTC(14,3)有變化,但恒指點數就無變到喎,換言之(65572)證價其實都無因此而有所變動。(證價是按underlying 的走勢而出現改變,不是因為技術走勢而改變的),於是唯有繼續揸貨過夜。

瞓醒一朝早電視就話我知黃雨,咪又係要返工;再睇講番噚晚ADR走勢個別發展,即係暗示港股今日喺無其他嘢影響之下,港股都係打橫行為主,結果今朝恒指升19點開市;去到9點55分,恒指升幅先至稍為擴大,但講緊嘅點數都只係50至60點咁上下,不過喺恒指5分鐘圖SlowSTC(14,3)出現超買喎,即係話短時間嚟講呢個位對恒指已經係到咗頂,而噚日揸到依家嘅(66572)就可以係呢個時候放人,對比返噚日買入價,大約可以食到五至六格,即使注碼細都應該買到杯凍檸茶嘅。

依家10點45分,恒指由升轉跌,現報26440點,跌30點;同一時間恒指5分鐘圖SlowSTC(14,3)由超買變超賣。係呀,一日裡面可以出現超買/超賣嘅數目可以好多;不過你又留意返恒指個點數,根本就無乜大變動過,衰啲講句恒指個走勢同公司嗰班hea做嘅都真係無乜分別。轉返日線圖睇,以恒指由上周一(7月10日)至今大幅度上升,同肯量度反映恒指升跌力度DMI嘅ADX,前後弧度強,後者就同一條橫線沒有分別,唔係話恒指夾硬升,不過…有目共睹啦。更重要嘅係喺日線圖上見到恒指行緊疑似「圓頂」嘅走勢,即刻開個恒指牛熊證街貨圖睇吓先。

依家10點56分,恒指現價26402,向上睇熊證,重貨區係26700至26799點,呢度有相當於994張期指,屬於熊證第二貼價街貨區,用現價計的話就要個市向上行397點先食得到,連同最貼價嘅26600至26699嗰246張期指,總共可以食到1240張期指。

向下望牛證,咁啱得咁橋,最重牛證貨都係屬於第二貼價嘅區域,點數係25500至25599點,呢度有1405張期指,同樣地用現價去計嘅話,就要大市向下行多902點先到,連同最貼價嘅25600至25699點個88張噚日新增追升嘅牛證的話,total就有1493張期指。

認真,要個市咁樣向下殺到落到25500至25599點食個推街貨,似乎呢一兩日就真係無可能加啦;之但係日線圖見SlowSTC(14,3)超買加埋疑似「圓頂」嘅走勢,只可以估大市連升六日後稍為回氣,趁呢段回氣嘅時間小注恒指熊(62036),收回價26950點,同現價有逾500點差距屬安全之選。

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。