|
熱門:

2017年6月20日 即巿股評 港股直擊

【盤房來料】按兵不動等MSCI結果公布

隔晚美股又新高,雖然納指未能同步跟道指及標指,但科網股就報復式反彈,納指反而創下近月以嚟最大單日升幅。由於隔晚夜期跟住歐美股市上,今日恒指順理成章高開103點,重上二萬六水平,一度高見26043點高位,可惜無以為繼,未幾已倒跌,更一度跌至25857點,逼近10日線(約25852)見支持。加上內地股市由跌轉升,港股跌幅亦收窄,半日恒指報收25903點,跌20點;國指則跌42點,報收10477點。

噚日成交相當奀,唔多配合升近300點嘅市況,阿Man建議先減磅亦冇錯,估計今日成交都係咁上下,皆因缸邊友等緊今晚美股收市後,MSCI明晟公布納唔納入A股入新興市場指數,寧願按兵不動。其實A股之前三次被MSCI拒諸門外,主要係流通問題解決唔到,今次好有機會以縮水版先,即「港股通」可買賣A股作為最低消費,先放A股入場,睇嚟今次未必再撻Q。

A股入摩與否,對港股實質影響有限,唔入摩有繼續憧憬嘅藉口,入摩僅限縮水版,所佔MSCI新興市場指數比例或只有0.5%,買貨規模唔到100億元,不痛不癢,仲要一年後實施,亦唔見得對港股帶嚟即時刺激。反而係大戶點演繹公布結果。見噚日個市成功收復10日及20日(約25779)線,今日又守住10日線唔落番去,睇嚟大戶傾向托住個市居多。呢個6月結算上嘅機會大過落,又或者Cap死咗喺25500至26000點呢幾百點內。

暫時仲係慢牛格局

除咗半年結因素,七一回歸廿周年跟十九大會議前,有習大大氣場作保護,無論港股同內地股市都唔容易跌。只係港股上升未見成交配合,長此落去唔走得遠,即使用A股入摩作升市理由,呢轉可能上到26200至26500又會遇阻力,唔係咁容易一口氣衝上二萬七。港股暫時仲係慢牛格局,大方向無變,阿Man仍然相信今年高位未見,只係現水平追貨冇著數。長氣都係講嗰句,連升多月未見較大幅度調整,行到牛三瘋狂直線上升前,通常都要見一見呢一吓急回,目前未宜太進取。建議坐住強勢股如騰訊(00700)又或者上周阿Man推介嘅濠賭股,保持升勢可持有,唔轉勢唔使走,追貨寧願等爆邊上,追貴百幾點,好過依家買完要先見調整,隨時要捱一千幾百點。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。