|
熱門:

2017年6月20日 即巿股評 港股直擊

【輪證贏家】A中牛博「入摩」

噚日恒指朝早裂口高開之後就一直係25900點呢啲位上落,拆開恒指5分鐘圖其實都只係得一個位勉強叫做見到超賣,就係喺朝早11點15分,SlowSTC(14,3)%K線同%D線齊齊出現「3」字頭;即使係下晝2點40分有見到SlowSTC(14,3)向下凹咗一下,不過仍未足以稱為超賣,換言之,恒指牛(61420)無機會落場。不過又未使灰心,事關我同戰友Jack都留意到個成交得600幾億,實在太奀啦。

今朝晨咁早就同老爺起咗身,然後喺銀行未開門時就企定喺門口同啲公公婆婆一齊排隊,事關要到某一啲銀行去現鈔兌俄羅斯盧布呢啲冷門貨幣;放心,唔係我去俄羅斯,係我家老爺單拖去俄羅斯睇洲際國家盃。基於今朝早同老爺去銀行兌錢嘅關係,電視都無開就出咗門口,上到地鐵已經做緊U盤,海都未過就已經夠鐘開市,今朝恒指開報26028點,升104點;到我返到公司開晒所有機之後,一開見到恒指見紅,仲以為自己未瞓覺,望真啲原來今日開市嗰吓裂口高開之後,依家10點8分,恒指已經下行兼補完今朝早開市個上升裂口,高開低走嘅樣確係肉酸,喺10點9恒指依家做緊25910點,跌14點,5分鐘圖上見到恒指企住條250分鐘線(5x50線,現報25902點)之上,呢條線其實由噚日恒指裂口開市嗰吓到依家都都叫承托住恒指,現時(10點16分)5分鐘圖恒指嘅SlowSTC(14,3)%K線(15.97)同%D線(27.27)都已經踩咗入嚴重超賣嘅範圍,即係話短期內恒指落到呢個位有望會停一停。

返番去日線圖睇,其實恒指今日粒燭係完全企咗上條10天線(25852點)樓上;換條保歷加通道嘅話可能睇得清楚啲,恒指由早前喺保歷加中軸下方彈返上去上方,踩返入去上升通道裡面,依家就正正企係保歷加通道頂(26156點)同中軸(25779點)中間,如果用保歷加通道頂(26156點)度落去恒指牛熊證街貨圖嘅話,即係會踩咗入恒指熊證重貨區26100至26199點呢個範圍,呢度有相當於1239張期指,若然A股成功「入摩」刺激大市嘅話,要由現價上到呢個位真係無乜難度,更何況仲有餐勁嘅等緊班大戶添。恒指牛(60534),收回價25158點,揀呢隻除咗因為佢成交活躍、低街貨兼有40倍槓桿之外,最重要係佢嘅收回價低過牛證現時重貨區25200至25299點,touch wood唔知咩事一開市就向下殺落牛證重貨區嘅話,(60534)都仲有時間轍退。

若然真心博A股成功「入摩」,咁就直接睇安碩A50(02823),呢隻嘢連續三日都貼住條保歷加通道中軸(11.92元)行,日線圖見依家SlowSTC(14,3)%K線(22.99)同%D線(27.81)處於超賣區,但重點係%K線有升穿%D線嘅形態存在,一個唔該反彈嘅話,分分鐘一彈就上保歷加通道頂(12.31元),A中牛(69008),收回價10.9元,市場上最貼價嘅牛證,成交又係最多喎,小注一試也無妨呀!

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。