|
熱門:

2016年12月2日 即巿股評 港股直擊

【盤房來料】港股失守多條移動平均線勢危

一直相信即使下周「深港通」啟動,雖然未必能即時為大市帶嚟刺激,但至少亦有助大市穩守喺22800水平之上。結果今日瞓醒港股就已經腳軟,「深港通」未通車,兩地股市就齊齊插水。深成指數半日挫逾1.2%,而港股升咗兩日,以為頂多是獲利回吐,但恒指相繼失守10日線同100日線,條20日線又岌岌可危,港股個勢認真麻麻。

恒指今早低開141點,報22736點,100天線(約22864點)話咁易失守,開市再插深啲,恒指挫逾200點後,跌幅一度收窄至122點,見22756點半日高,可惜未企穩腳,沽壓又嚟襲擊。半場收市報22612點,10日線(22689)亦玩完,半場低位22602點,收市報22612點。國企指數中午報9796點,跌96點或1%。A股向下,深圳股市更跌超過1%。

個別板塊表現麻麻,濠賭、金融和科網3個板塊明顯跑輸,龍頭騰訊(00700)近日有得震,冇得瞓,股價半場跌2%或4元,收190.5元又係跌至重要支持位之前。幾乎所有重磅股都自身難保,只有油魔支撐中石油(00857)同中海油(00883)仲逆市升。中資金融股全面插水,

11月澳門博彩收入升14%好過預期,不過德銀最新嘅報告,指出澳門擬規定旅客帶12萬澳門元以上須申報,若規定落實對貴賓廳業務影響好嚴重,濠賭股未跌夠,板塊今日回繼續吐。其他股仔唔多啱阿Man胃口,升幅榜冠軍五龍動力(00378)逆市升23%,可惜此股一向貨疏,買賣差價闊,無市場深度,完全唔侵外人玩。

民生珠寶猛人入主

之前提過嘅民生珠寶(01466)表現強勁,每次回吐過後回升都創年內高位,今日又唔例外,創52周高3.87點。話咗猛人入主點會唔做嘢,果然氣勢如虹交足功課。其他股仔無心水,至於大盤重磅股,等埋呢個星期意大利公投同下周深港通開車再作定奪。

P.S. 見到P.S.,通常都係阿Man要出門,無錯今年中出咗家居意外,二至三級燒傷,做完手都需要長時間康復。死過翻生執番條命仔,當然要還神,呢幾日忙於還神,仲要出走寶島答謝神恩,所以周一盤房來料暫停一日,周二回復正常。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。