|
熱門:

2016年12月2日 即巿股評 港股直擊

【輪證贏家】為深港通開通做定準備

噚日雖然再追牛證,不過噚日臨尾講過小心恒指日線SlowSTC(14,3)進入超買,果然噚日朝早個市隊咗上去23012點之後就變成咗全日高位,跟手個勢都慢慢向下,好彩用且戰且走呢個策略,如果唔係今日就多災多難。

晨咁早就收到個消息話我阿公決定做佢人生第三次心臟通波仔手術,因為佢想將80幾歲嘅身體變番做18歲嗰時咁可以通山跑;對我嚟講呢個消息震撼過今朝港股裂口跌141點開市,然後喺10點10分失守條10天線(22695點)。

老人家嘅決定通常會加入大量嘅堅持同固執,呢單嘢都係由得佢班仔女,即係我老媽同舅仔處理算啦,我都係做返我識做嘅嘢:睇圖。依家10點15分,恒指10天線(22697點)同100天線(22864點)都無咗,得返條20天線(22594點)頂住,換條保歷加通道出嚟睇,20天線就相當於保歷加通道中軸,原來噚日保歷加通道頂部剛好就係噚日恒指個高位,怪不得今日個市被班淡友拉落嚟啦,而保歷加通道底部就係22145點,即係話短線嚟講最悲觀就用呢個位度住先。

「咁快就轉勢?下個禮拜一(12月5日)仲有『深港通』登場喎?」So?恒指日線圖嘅SlowSTC(14,3)由噚日嘅嚴重超買轉為今日嘅勢頭向下已成事實,就算下個禮拜一出「深港通」,不過如果市場係要借好消息出貨嘅話,佢話知你個深港通點通,個市要跌都阻止唔到架啦;更何況今日挨住條20天線都仲未知道呢條線夠唔夠力。

如果個故事嘅發展係:恒指連升兩日之後今日要出現回吐,所以今日恒指會出現跌勢;不過下星期一「深港通」開通,大家點都要比個面升吓個市搞吓氣氛咁,咁咪有一個「好消息」去比人「出貨」,順個便可能食埋23100至23199點呢893張期指重貨(連同埋23000至23099點呢642張期指嘅話,夾埋都有成1535張期指架);出完貨之後又點?咪同打完齋都係一樣囉。所以恒指牛(63446),收回價22200點,用呢隻嘢打完個頭陣之後就換隻熊,暫時篤住隻恒指熊(61914),收回價23400點,揀呢隻都只係貪佢收回價同現價有逾3%差距,或者可以用「3%差距」為揀證條件之一。

本故事純屬虛構,如有雷同實屬巧合。(總之係無明確方向嘅市況之下做trading就要抱住一個且戰且走、唔貪心同小注嘅心態,萬一有咩事受輕傷都好過得返半條人命呀)

作者阿珊,從事財經及投資版報道超過10年,由平面媒體走到網絡世界。相信技術分析,由窩輪到牛熊證無一不炒,唔貪心,志在搵餐下午茶。

電郵:[email protected]

回上

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。