美股上周五續升，即使美企公布業績未如理想，甚至調低下季或全年預測，又或者有企業決定裁員，省減支出，一於少理，樂觀情緒蓋過一切，美股睇似愈升愈有，不過反映中概股表現嘅金龍中國指數表現麻麻，中概股喺退市陰霾下腳軟，港股上周跌咗452點後，今日一度失守二萬大關，跌逾200點。
恒指低開129點，一度跌272點，見19883半日低位，亦係兩個半月新低。其後內地股市倒升帶動下，港股跌幅收窄，一度僅跌23點，見20133半日高位。恒指半日跌65點，報收20091；國指跌5點，報6880；恒科指倒升8點，報4339。半日成交額644.1億元，都係靜局。
藍籌股個別發展，大笨象(00005)公布業績前半日跌0.6%，不過中午公布業績上季倒退15%，較市場預期理想，派息9美仙，亦較市場預期8美仙多，午後有機會轉跌為升。至於港交所(00388)今早都係逆市升1%，市場憧憬中概股退市，將回流港股上市，對整體成交有正面影響。啤酒股今日回升，百威亞太(01876)半日升6.4%，表現突出。
汽車股受惠於中央延續免徵新能源車購置稅消息，半日整個板塊逆市做好，吉利(00175)半日升11%，開始接近18元阻力位。其他汽車股全線向上，普遍升預半成，比亞迪(01211)可能較為重磅，半日升4%，逼近300元阻力。
阿里巴巴(09988)被美國證交會(SEC)納入將會從美股除牌中企名單，上周已失去紅底股身份，上周五股價亦喺美國急跌，今早一度跌逾半成，半日跌2.2%。不過其他科網股表現又唔算太差，美團(03690)早段曾低見173.7元，但好快已扭轉跌勢，半日升2.6%，重返180元水平。京東(09618)係另一隻阿Man一直關注，認為可以逢低吸納嘅重磅科網股，雖然早段曾跌穿230元，但未幾已收復230水平，並倒升近1%。
內房跟物管股表現疲弱，物管股金科服務(09666)向母企金科股份(000656.SZ)，授出15億人民幣貸款，金科服務半日大跌33.6%。可能係金科服務急挫，拖累其他物管股顯著下跌，碧服(06098)半日跌近一成，成為半日跌幅最大藍籌股。其他內房股亦走弱，跌幅由超過2%至超過一成不等，唔少更創年內新低。內房跟物管股睇嚟未有耐搞返得掂，未有貨嘅咪手多，至於有貨喺手，除咗等待同忍耐，似乎都無乜可以做，不過等同忍都要睇持有邊間內房同物管股，若然係財政狀況較弱，已出現咗違約情況嘅，就真係要考慮係咪趁反彈走佬。
麥狄文
(徐狄怡‧證監會持牌人)
