隔晚美股仍然下跌,不過夜期跟ADR未受影響,除咗係中概股反彈之外,阿爺再度出招穩住股市,人行下調5年期LPR利率沖喜,港股今日反彈,恒指曾升逾400點,受制2月17日以嚟延伸嘅下降軌,加上周末前夕,唔少缸邊友取態保守,限制大市升幅。恒指高開350點,最多升482點,見20602半日高位,可惜仍然受制下降軌,加上成交唔見得顯著增加,上升動力只係一般,令大市升幅收窄至288點,見過20408半日低位。恒指半日收20489,升368點;國指升148點,報收7046;恒科指半日升143點,報收4234。
藍籌股今日以金融股表現較佳,無論本地跟內地嘅銀行保險股都有進賬,其中招行(03968)經過一輪風雨後,終搵到新行長人選,半日股價升5.4%,藍籌股中跑第一。而科網股亦普遍向上,ATMJX嘅小米(01810)派咗季度成績表,首季錄得虧損約5.88億人民幣,但股價半日亦升近4.9%,但股價積弱已久,遲遲未能重返12元之上,有貨喺手都要諗諗走唔走。
不過物管股今日就腳軟,受債務問題困擾嘅金科仲跟重慶政府講緊數,集團旗下嘅物管公司金科服務(09666)半日跌近兩成,金科股份喺內地A股亦跌近一成。拖累物管股板塊逆市下跌,阿Man偏愛嘅碧服(06098)亦受拖累,半日跌逾3%,暫時未能突破32元阻力位,更成為半日表現最差嘅藍籌股。其他物管股亦腳軟,但相對跌幅唔算嚴重,始終內房最艱難時期已捱過,要爆煲嘅公司都爆得七七八八,嚟緊嘅時間就係汰弱留強,行業整固。
香港呢邊自4月底已全面禁制電子煙,不過中國就跟世界接軌,未有打壓電子煙,反而係做好規管,內地正式發報《電子煙零售許可證》,電子煙相關股份有追捧,龍頭思摩爾(06969)半日升6.3%,表現最標青。不過升到18左右,思摩爾又見阻力,加上今日周末前夕,當然唔建議追貨。
國務院總理李克強表示,今年要堅決杜絕拉閘限電,唔限電咁即係火電要用嘅煤炭需求自然上升。煤炭股吽咗一段時間,今日落鑊,板塊內股份升幅由超過2%至8%不等。不過煤炭股嘅高位早喺上月見咗,就算今日翻炒,亦只會空間上落,既然如此,亦唔需要去追貨。
麥狄文
(徐狄怡‧證監會持牌人)