熱門:

2022年1月20日 即巿股評 港股直擊

【盤房來料】狂挾淡倉盡屠熊

美股喺10年期美國債息升至1.9厘下,連續兩晚顯著下跌,不過人行呢邊就放水,下調LPR利率,帶動港股今日半場升逾500點,成功收復100天線(24605)。恒指高開135點後,高開高走,升幅持續擴大,半日最多升569點,見24697半日高位。中午恒指報收24689,升561點接近半日高位;國指升240點,報8682;恒科指勁升3.3%,升187點,報5830。半日成交額增至912.9億元,總算配合升勢。

藍籌股普遍向上,不過瑞聲(02018)發盈警,預期去年盈利倒退,中午大跌近一成,藍籌之中包尾;而中石油(00857)涉違規,但公司表明將積極配合調查,半日跌2%;而大笨象(00005)半日跌1.1%,升咗咁多日,唞唞都好正常,加上55元阻力甚大,唔係咁容易突破。友邦(01299)跟平保(02318)半日升逾4%,前者為恒指貢獻唔少升幅。港交所(00388)半日升近2%,留意逼近100日線,近468元將遇阻力。

內地有消息指騰訊(00700)收購小米(01810)旗下黑鯊科技仍處洽談中,騰訊半日升4.7%,小米半日升2.1%。美團(03690)半日近7%,股價重上220元水平後,升勢有餘未盡,較大阻力位喺240元,支持位料可上移至220元。阿里(09988)半日升逾4%,逼近130元阻力,睇下半場有冇本事突破130元阻力,如能突破企穩,有條件進一步向上挑戰140元阻力,120元為短線支持。

內房股跟物管股繼續有資金流入,今日反彈力更大,不過唔算喺年內低位嘅華潤置地(01109),半日升唔夠1%,相對財務狀況較差嘅內房股,升幅閒閒地超過5%,當中之前市場擔心有機會出現債務違約嘅融創(01918),半日更升逾一成。物管股以合景悠活(03913)半日升17.2%,表現最標青。

安踏(0020)發盈喜,預期去年盈利增長逾四成半,股價半日升6.4%,帶動板塊內其他體品股向上,不過升幅當然係兩隻龍頭勁啲,李寧(02331)半日亦升逾半成。航運股逆市走低,波羅的海乾散貨指數連跌九日,雖然航運費仍然高企,但相關股份累計升幅,足以反映航運費高企嘅利好因素,估計呢個板塊升勢已告一段落,仲有貨喺手,好好睇住食糊。

睇個勢大市都係挾住淡倉先,只要能夠企穩100天線,下一步當然係向住25000關進發,24600重熊區已壯烈犧牲,下一個重熊區喺25000至25100,即管睇吓期指結算前,能否一舉衝破25000阻力再劏熊。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads