美國10年期債息抽升至接近1.9厘，美股隔晚假期過後跌勢顯著，納指跌幅超過2%，更已較高位回落一成。港股半日表現反覆，恒指一度升173點後掉頭倒跌，目前喺24100水平爭持。
恒指高開117點，其後升173點，見24286半日高位，但在內地股市倒跌拖累下，港股亦由升轉跌，盤中曾跌14點，見24097半日低位，中午散場總算收復失地。恒指半日收報24117，升4點；國指升10點，報8459；恒科指跌8點，報5690點。
藍籌股個別發展，大笨象(00005)半日跌0.4%，建行(00939)半日跌0.2%，藥明(02269)跌2.7%，比,亞迪(01211)半日亦跌2.7%；新奧能源(02688)半日跌4.4%，為表現最差藍籌股。ATMXJ則個別發展，阿里(09988)跟小米(01810)分別跌0.8%及0.6%；騰訊(00700)跟美團(03690)半日升0.3%，京東(09618)與Shopify達成戰略合作協議，半日升2.4%。
雖然美國提早加息之說吹得頗勁，但相反內地經濟增長放慢，貨幣政策較歐美寛鬆，市場憧憬明日中國貸款市場報價利率(LPR)將下調，內房股繼續反彈。整個板塊今日普遍向上，升幅由超過2%至5%不等。至於物管股反彈力度更大，龍頭碧桂園服務(06098)半日升近7%，係表現最佳藍籌；其他內房股至少升4%以上。不過，相關股份中線走勢仍未轉好，暫時只係反彈，呢兩個板塊要扭轉弱勢，前面仍有漫漫長路。
為咗穩定經濟，內地已鐵定推動及加快基建發展，相關股份有資金追捧，事實上大部份基建股目前估值仍處於歷史低位，有機會獲估值重評，預期今年上半年可跑贏大市，而阿Man嘅心水係中國重汽(03808)，只要能重上13元企穩，走勢料有突破。
麥狄文
(徐狄怡‧證監會持牌人)
