港股連續四個星期反彈，恒指升逾千點後，開始進行整固，今早表現反覆偏軟，暫時仍守喺24000水平之上。恒指高開6點，曾高見24408後掉頭回落，內地公布去年第四季GDP按年增長4%，好過市場預期，大市跌幅曾收窄，但其後又復跌逾百點，最多跌195點，見24187半日低位。恒指中午報24240，跌143點；國指跌84點，報8470；恒科指跌56點，報5712。
藍籌股個別發展，大笨象(00005)七連升，半日再升0.6%，升至近23個月高位；原油價格上周累升6%，亦係連續第四個星期上升，三桶油繼續逆市做好，中海油(00883)半日升1.3%表現最好。至於科網股今日普遍偏軟，，ATMXJ全部隨大市回軟，當中以美團(03690)跌逾2%表現較差；騰訊(00700)跟京東(09618)跌逾1%；阿里(09988)跟小米(01810)分別跌0.6%及0.8%。
藍籌之中以碧桂園服務(06098)表現最差，半日跌7.4%；母公司碧桂園(02007)半日亦跌7.4%；其他內房股跟物管股普遍下跌，主要係去年12月全國70城新建商品住宅價格指數同比升2.6%，漲幅為2015年12月以來最弱；環比下跌0.2%。只有央企背景嘅潤地(01109)半日升2.4%。
電動車股今日有唔錯表現，主要係跟住內地電動車產業鏈A股普遍向上，帶動比亞迪(01122)升2.2%；GX中國電車(02845)升2.1%；小鵬汽車(09868)半日升1.6%；但以傳統汽車比重較大嘅吉利(00175)跟長城(02333)半日分別跌3.5%及2%，表現強差人意。雖然國家能源局公布，2021年全社會用電量83128億千瓦時，按年增長10.3%。不過電力股普遍受壓，中國電力(02380)插6%；華潤電力(00836)挫4.1%。就連風電股龍頭龍源電力(00916)亦偏軟。
暫時港股無乜方向，喺24000至24200點左右整固，需要時間整固一下，喺未有新資金流入下，資金流動，板塊只有輸流炒作，難以百花齊放，後市要睇重磅科網股有冇力再帶動大市向上，暫時整固期間只有靠金融股撐住，恒指能守住24000，後市仍有機會向上挑戰100日線，即24600水平。
麥狄文
(徐狄怡‧證監會持牌人)
