美股隔晚個別發展，標指創新高後倒跌，納指亦報跌，只有道指維持升勢，而內地股市低開低走，港股五個交易日升咗五百幾點後，今日上半場走弱，喺重磅科網股拖累下，恒指半日跌逾200點，10天線(23168)再度失守，恒科指再逼近成立後新低。由於北水休假，半日成交額縮水至不足400億元。
恒指低開26點後，半日高位23253見完就持續向下，跌穿10天線後，最多跌221點，見23058點半日低位。恒指半日收報23075點，跌204點；國指跌89點，半日收報8104；恒科指跌至5463點半日低位，半日跌85點，報5483。
藍籌股個別發展，友邦(01299)、平保(02318)跟港交所(00388)跌不足1%，大笨象(00005)逆市靠穩，微升0.1%，新世界(00017)雖然只係升1.2%，但已經係表現最好嘅藍籌；至於表現最差嘅海底撈(06862)，都算係大熱門，自從海底撈染藍後，一直未好過。
科網股整體仍受壓，美團(03690)跟快手(01204)搞合作，以為可以強強聯手，合作結果如何仍屬未知數，但市場似乎唔多受落兩者合作，半日兩股分別跌2%及4.4%。騰訊(00700)跟阿里(09988)分別跌1.5%及2.6%，京東(09618)跟百度(09888亦難逃一跌。嗶哩嗶哩(09626)更創本港上市後新低。
唔係阿Man對內房股有特別偏見，話咗債務問題纏繞下，呢個板塊無運行，今日輪到奧園(03883)遭花旗等索債1.31億美元，股價半日跌近一成，其他內房股陪跌，跌幅由0.8%至4.4%。總之內房股暫時都係無得搞，千祈唔好因為累積跌幅大就心思思想買貨，要記住跌得多，並唔係一個買入嘅理由。
麥狄文
(徐狄怡‧證監會持牌人)
