噚日揀咗隻恒指熊(60628)出嚟，仲喺下半場2點幾趁五分鐘圖見Slow STC(14,3)上到超買位時落場，都唔駛等好耐，喺之後嘅3點20分至3點50分，Slow STC(14,3)兩線已經回落返去超賣水平，喺呢個時侯走隻(60628)就剛好完成一個Swing Trade。以當時(60628)高低位0.045元/0.042元計，平均沽貨價為0.0435元。對比噚日嘅平均買入價0.04元，一個下半場即日來回平均賺幅為8.75%，真係唔貪心夠個下午茶就心滿意足。
今朝恒指開市都唔係有大太變動，講緊完U之後開市報23253點，微跌26點，年尾嘛，我諗除非有件好重要、會影響到全球嘅事出咗嚟，否則指數隨時呢幾日都會躺渡過。終於等到恒指正式開市，指數二話不說地向下再落，到依家9點33分，恒指跌幅擴大至跌90點，喺五分鐘圖上見指數已經出現一支「大陰燭」，推到指數落到保歷加通道底線附近，所以都喺聊天室度講底話可以出淡倉，以追返Slow STC(14,3)向下落到超賣，只係依家見到Slow STC(14,3)兩線暫時仍然處於中軸水平，彷彿有一種你急我唔急嘅施施然向下落嘅走勢。
雖然係咁，但指數一直下行至9點50分左右，五分鐘圖上嘅Slow STC(14,3)兩線落到超賣至嚴重超賣範圍，聊天室裡面第一注淡倉成功收割。
其實，喺日線圖上見到指數今日仍然穿住咗條10天線，喺走勢圖上並未見到好明顯嘅變化，不過，留心Slow STC(14,3)兩線嘅差距比噚日係收窄咗，由噚日大約32/29變成依家見兩線都處於31重疊，一旦Slow STC(14,3)兩線收窄嘅情況繼續落去，隨時會見到%K線下穿%D線，先唔好畫住條「下降通道」，落落去保歷加通道底線約22702點的話，咁22600至22699點同者22500至22599點呢兩層重貨牛都真係麻煩啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
