熱門:

2021年12月6日 即巿股評 港股直擊

【盤房來料】恒大終違約 內銀內房暫勿沾手

上周五美股納指跌勢顯著,跌幅接近2%,主要係市場憂慮美國上市嘅中概股被逼全面退市,上周五金龍中國指數重挫近一成,創下2008年以來最大跌幅。港股連跌三星期唔見超過千五點後,今早又插水近400點。

恒指低開346點報23420;開市早段最多跌398點,見23367半日低位;之後A股向好下跌幅收窄,恒指一度僅跌138點,見23628點半日高。不過臨近中午跌幅又擴大,恒指中午跌300點,報23466、國指跌131點,報8323;恒科指係重災區,跌162點,跌幅達2.7%報5763。

藍籌股有啲奇怪,升幅最大竟然係碧桂園(02007),半日逆市升3.7%;恒大(03333)上周五先收到要求,要履行一項金額為2.6億美元擔保義務的通知,並表明在恒大未能履行擔保或其他財務責任的情況下,可能導致債權人要求債務加速到期。恒大半日跌12.4%。照道理呢個時候,內房股都係可免則免,講真,整個內房板塊仲有幾多債務問題未爆出嚟,都係未知數,阿Man就寧願避開風眼。

巨額債務壓身嘅中國恒大掙扎半年後終現實質違約,睇返啲公開資料,恆大嘅資產負債表內債務約2萬億元人民幣,但表外債務至今成謎,估計總債務已達「登峰造極」。市場信心如同骨牌倒塌,下一步投資者最擔心嘅呢個中國版「雷曼風暴」將蔓延至銀行等金額機構,引爆金融體系危機。

一眾內銀對恒大風險敞口三緘其口,但近排多個財經討論區都有網民點名被外界視為恒大主要金主之一嘅中信銀行(00998),直指該行涉及恆大嘅貸款幾乎全部由現任行長方合英拍板審批。傳聞仲話中央第九巡視組正對包括中信銀行在內嘅金融單位開展巡視,地產相關信貸審批絕對係巡視工作重中之重。而方氏喺2017年正式任職中信銀行財務總監,上任無耐該行就同恒大達成咗個所謂嘅「千億+」合作計畫,成為中信銀行踩雷恆大罪魁禍首。中信銀行暫時未見回應,但傳聞言之鑿鑿,現時內房同內銀建議大家都係避之則吉。

中概股一旦被美股趕盡殺絕,都要返嚟港股上市,以另覓集資渠道,港交所(00388)當然受惠,半日升3%逆市走強有其道理。不過去到465呢啲價附近,阿Man就唔建議再追貨,要買貨係450左右收集穩陣,無貨食下花生睇戲算。
雖然中證監派晒定心丸,但市場仍擔心喺美國上市嘅中概股前路茫茫,今日喺香港第二上市嘅中概股,繼續跌到一仆一碌。阿里巴巴(09988)話咗沒有最低,只有更低,半日又跌逾半成,創上市後新低109.5元,半日報收113元。至於剛染藍嘅網易(09999)跟京東(09618)半日跌5%及3.3%。其他W股,理想汽車(02015)、小鵬汽車(09868)跟携程(09961),跌7.1%至11.5%不等。

另一個表現較疲弱嘅板塊係生科股,香港上市生物科技股指數大跌4.4%,龍頭藥明生物(02269)半日跌6.6%,藍籌之中跑第尾,其他生科股跌幅由7%至超過一成不等。不過阿Man覺得今日呢個板塊跌得有啲無辜,現價可以博一博藥明生物呢啲龍頭,用95做止蝕參考,個零銀錢博佢上返紅底股,都有一定值博率。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads