因為藥物敏感令到身嘅疹有增無減,所以又一朝早診所一開門之後就入去睇醫生,毫不猶豫咁同醫生講叫佢幫我打針,不過,喺打針之前姑娘都同我講打完之後係會勁眼瞓,我又見醫生開比我嘅藥全部都係會眼瞓,似乎想瞓到我接近不醒人士咁款,我唯有喺藥力發作之前做好所有嘅嘢。
今朝恒指低開之後回升,依家10點31分,指數喺五分鐘圖上面見到於保歷加通道內行到swing trade走勢,還好聊天室有部分戰友一齊玩得耐,掌握得到swing trade玩法,所以喺我等緊睇醫生嘅情況之下自行操作,那怕只係得幾格,有正數已經成功!
今朝指數喺五分鐘圖一下子衝上去保歷加通道頂之後,小時圖上見指數都開始想破破地條保歷加通道中軸,但同時見到保歷加通道口有收窄嘅情況,以依家指數得幾十點嘅升幅計,似乎連個市都好似未有方向咁。
又再望望個牛熊證街貨圖發生咩事,今日見牛熊兩邊都有新增街貨層係度,熊證最貼價層終於都見返24000至24099點,至於牛證都上返去23500至25499點。不過兩邊新增層嘅街貨量都唔多,可能係本身喺呢啲新增層數裡面嘅證都唔多掛,以依家10點37分,恒指做緊23692點計,指數仍然靠近牛證街貨嘅。
又咁講,睇返恒指日線圖見指數(計埋今日)喺呢三個交易日似乎喺23500點覓得支持,同步Slow STC(14,3)兩線都見出到觸底反彈,或者暫時對個市就算係看淡,都唔好淡得太離譜住。
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。