熱門:

2021年11月29日 即巿股評 港股直擊

【盤房來料】市場對變種病毒反應過大

一隻南非變種病毒,搞到全球股市腳軟,上周五美股假後捱沽,三大指數跌逾2%,市場擔心變種病毒Omicorn有擴散風險,全球又要收緊防疫措施,甚至再度封城。港股已經跌足兩個星期,今日再跌穿埋24000。

恒指低開170點,之後曾倒升53點,見24134點半日高位,不過其後沽壓再現,曾挫229點,見23851點,再創10月6日以來新低,24000關得而復失。恒指中午報23956點,跌124點;國指跌25點。唔知以為一路無疫情,啱啱先爆出新嘅傳染病毒,其實經歷咗年紀COVID-19疫情,又已經有疫苗面世,甚至口服藥亦已經測試中,市場對於呢個變種病毒反應,又好似大咗啲。其實道指期貨已反彈緊,補返上星期五晚跌幅嘅一半,但港股本身弱底,就借勢再踩多腳,再一次考驗年內低位。

話咗呢期業績博唔過,美團(03690)上周五收市後派成績表,第第三季虧損大過預期,半日插7.7%,已拖低大市160點,大部份跌幅來自呢隻重磅科網股。反而AMTX其他三位成員都反彈,阿里(09988)上返130水平,希望守得到。舜宇(02382)被視為具有元宇宙概念嘅股份,而港股中具備呢個概念而又係藍籌嘅股份相當有限,呢期都跑贏大市,半日逆市升4.1%,為表現最好藍籌股。由於疫情再度升溫,美國10年期債息回落,銀行股亦走軟,大笨象(00005)半日低0.8%。

濠賭股今日跌勢較為顯著,主要係太陽城主席周焯華涉違法開賭被捕,市場擔心周焯華跟澳門賭業負責人關係密切,加上太陽城一向係疊碼仔嘅領頭羊,憂慮澳門賭場收入,尤其貴賓廳收入,因為周焯華被捕而大受打擊。板塊內股份半日閒閒地跌6%或以上,美高梅(02282)股東何氏家族跟周焯華關係密切,股價半日更大跌一成。至於太陽城集團(01383)則於市前停牌,同系太陽娛樂(08082)半日瀉23.9%。

疫情因變種病毒再度升溫,疫苗股再度受捧,康希諾(06185)今早曾升12.7%,半日僅升3.5%;復星醫藥(02196)升2.2%;中生製藥(01177)升1.4%;CRO賽道亦跑出,市場憧憬新病毒疫苗開發,藥明生物(02269)升1.5%。不過阿Man認為今日市場對於變種病毒嘅消息有少少over react,疫苗股急升又唔企高位,暫時都係咪多手。

本來有望逐漸回復正常嘅航運業,又因為憂變種病毒擾亂供應鏈,航運價格暫時回落無望,航運股又炒起,板塊內股份升幅由超過2%至8%不等。只係航運價即使唔回落,短期亦未必會好似之前咁大升,急升都係咪多手追貨。反而可以留意返啲減碳排概念股,之前跌到死死下嘅龍源電力(00916)逆市做好,睇嚟調整已完成,只要16元守得穩,有望再展升浪,但條件係先要重上50日線,即係升破17元,先有望完全扭轉弱勢。

麥狄文
(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads