美股懶理通脹高企，以及債息趨升，同埋供應鏈緊張等負面因素，喺企業公布季績理想支持下，美股三大指數再升，而唔少已公布季績嘅美企，更調高全年盈利預測，支持美股高居不下。港股喺科技股帶動下，今早曾升逾400點，恒科指升幅更超過3%。恒指高開286點，報26074點，升幅一度收窄至128點，以為二萬六關得而復失，誰知A股回升及科技股起動下，港股回勇，恒指半日曾升427點，見26214點半日高位。中午恒指報收26125點，升勢略為回順，半日升338點。國指則報收9285點，升149點；恒科指跑贏半日升逾3%，升202點，半日報收6721點。
藍籌股普遍向好，不過大笨象(00005)之前威咗幾日要抖抖，半日逆市跌0.3%，工行(01398)及建行(00939)半日亦跌0.7%，反而內險股仲頂得住。噚日阿Man都話大笨象抖氣由友邦(01299)接力，半日友邦再升1.2%。雖然近日IPO靜咗，暫未見有大型IPO登場，但港交所(00388)喺大市氣氛改善下，半日升1.2%，終於收復全部移動平均線。汽車股繼續強勢，吉利(00175)半日再升3.8%，比亞迪(01211)半日亦升近1%。
科網股回勇，ATMX之中一直較落後嘅阿里巴巴(09988)今日發力，半日勁升8.1%，旗下阿里健康(00241)更升14.6%，成為最大升幅藍籌股。有消息指馬雲目前喺歐洲進行考察，口痕友話馬雲可以出國，唔再被困於中國境內，反映阿爺已正式原諒馬雲，阿里巴巴從此走出被阿爺釘死嘅困局，下一步當然係旗下螞蟻集團，幾時可以重啟上市申請。
噚日阿Man話要吼京東(09618)，博佢喺雙十一購物節前炒返鑊，半日升3.3%都算有交代，暫時上望首目標340元，既然整體市況好轉，暫又唔太急食糊落車。其他科網股均有進帳，騰訊(00700)跟美團(03690)，仲有小米(01810)半日都升逾2%。無貨喺手暫時再追貨值博率已大減，反而留意反彈至阻力位唔行，不如先將部份貨沽出，待回吐吸納，多做短線操作，高沽低買將持貨成本拉低。
發改委研究對煤炭價格實施干預，嚇到動力煤期貨喺內地跌停，煤炭股逆市下跌，閒閒地跌幅超過4%，兗煤(01171)半日更跌一成，煤炭股呢期都係唔搞得。火電股當然有得彈，整個板塊回升2.8%至7.5%不等。不過阿Man都係鍾意新能源股，前日推介嘅龍源電力(00916)呢兩日穩定上升，今日順利突破20日線，只要守得住，股價可望再上一層樓。
麥狄文
(徐狄怡‧證監會持牌人)
