熱門:

2021年7月28日 即巿股評 港股直擊

【盤房來料】市況未穩定 寧買貴 莫買錯

美股隔晚回吐,港股經過三日累跌近一成,恒指跌咗2637點後,落到25000水平反彈都好應該,可惜內地股市反覆,仍未能止瀉,拖累港股反彈乏力,但繼噚日成交額創下新高後,半日交投仍然暢旺,成交超過1500億元。

恒指高開270點報25356,升幅曾擴至434點,見25520半日高位。但市場唔少人趁反彈走佬,高位沽盤再現,大市升勢不保,曾倒跌168點,低見24917,隨後大市好淡爭持。恒指中午報25027,跌59點;國指升33點或0.38%,報8913;科指跌1點,中午報收6248點。

早兩日係威係勢嘅大笨象(00005),半日跌0.8%;而早兩日死守90元嘅友邦(01299)反而失守兼半日跌3.7%。阿Man話咗ATM未宜接飛刀,面臨估值下調壓力,又被監管風暴困擾,三股半日唔識彈,即使美團早段曾勁彈12%,但半日都要倒跌0.1%,阿里(09988)跟騰訊(00700)半日分別跌3.7%及0.7%,彈都彈唔起,睇嚟有基金大戶同北水繼續減持。

至於小米(01810)一向話較另外三巨頭安全,半日彈返1.4%。安踏(02020)噚日跌過籠,午後曾殺到去條100日線,今日彈返7.9%,逼近50日線,上得返去168.72,應該仲有得彈。

物管股整體反彈,旭輝永升(01995)及世茂服務(00873)發盈喜,半日反彈7.5%及6.3%,不過兩者已跌離多絛平均線太遠,反彈會遇到重重阻力,有貨都係趁反彈逃生。

碧服(06098)半日彈近一成,係最大升幅藍籌股,其他物管股普遍反彈超過半成。只係阿爺剛剛出指引要監管物管呢個行業,唔知幾時又動真格,若然搞到限制管理費,又或者限制收購擴張,咁就整個板塊會遭到降評級,同埋估值重評,暫時都係咪多手,有貨都趁反彈走。

至於生物科技股表都算唔錯,普遍反彈都有5%,不過呢個板塊同屬高政策風險股,無貨都咪心思思衝動入場。

唔少缸邊友都問,究竟個市跌完未,幾時可以入場,暫時個市都係未穩,恒指留意24880呢個位,跌穿要見24000先有支持,暫時睇住ATM幾隻龍頭,佢哋未跌定,個市都仲係危危乎,若然閣下已減晒倉,揸住現金保本為上,待市況轉穩再入場,至少都要等25000守返穩,兼且成交回落,大撼大情況過去,先再考慮入場都唔遲,幾時都係寧買貴,莫買錯。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads