熱門:

2021年7月22日 即巿股評 港股直擊

【盤房來料】恒大債務問題纏身 趁股價反彈要走人

美股連續第二個交易日反彈,道指再次逼近歷史高位,港股連跌三日後反彈。恒指高開239點,早段升幅曾收窄至230點,見27455點半日低位。其後再發力,成功收復10日線(27632點),半日最多升535點,見27759點,靠近200日線(27787點)遇阻力。恒指中午收報27705點,升480點;國企指數曾重上一萬點,中午收報9993點,升161點;恒科指中午收報7468點,升140點。

藍籌股個別發展,今日消費股發軟蹄,安踏(02020)跟申洲(02313)跌逾1%,其他藍籌股普遍反彈,科網股ATM今日有得彈,不過相對之前跌幅,美團(03690)半日彈3.6%、阿里(09988)跟騰訊(00700)分別彈1.9%及1.2%,略嫌彈力不足,叫做有得彈好過無。微盟(02013)短短一個月時間跌咗四五成,公司表示中期業績後將展開回購計劃,股價終於有得彈,半日彈14.3%係最大升幅恒科指成份股,暫時股價喺10元應有支持,今日反彈亦見成交配合,希望呢下真係見咗底。

港股繼續炒股唔炒市,資金隨消息喺不同板塊之間流動,早幾日恒大(03333)債務問題引發資金從內房及物管股中流走,噚日又輪到大笨象(00005)跟渣打講到明,停止為恒大旗下樓花買家提供按揭貸款,停供按揭僅涉及恒大兩個正在建設中嘅樓花項目,接近現樓項目則不受影響。呢個消息對內房股當然有負面影響,其實呢個板塊中不乏優質股,可以趁無辜被拖累時低吸。

留意偉祿集團

好似着眼於大灣區發展嘅兩隻屬二三線嘅內房股龍光地產(03380)跟時代中國(01233),正因為公司規模較細,未有過度擴張及大量舉債,喺個別內房爆發債務危機之際,呢類內房股反而成為避風港。而算係半隻大灣區房地產股嘅偉祿集團(01196),除咗係集中大灣區,特別係深圳項目之外,公司嘅金融服務業務板塊不斷加碼,有助分散集中房地產投資嘅風險。至於集團於深圳嘅物業項目市值已達112億港元,目前總共擁有6個物業投資項目,並且不斷推進位於深圳核心區域的物業投資發展。其中偉祿科技園,成功抓緊光明區「打造成世界一流科學城」發展嘅機遇,價值有望進一步釋放。

至於恒大系今日反彈,集團喺網站發聲明稱,與廣發銀行已解決財產保全裁定事宜。雖然恒大系反彈,但阿Man 長氣都要再講多次,喺財政問題困擾下,恒大呢一系避之則吉,缸邊友唔好留戀過往恒大炒到甩轆嘅戰績,有貨好趁反彈跳車鬆人。講完大灣區內房股,又睇返啲航運股,今早又發力,市場都睇好航運價下半年續升,今日整個板塊再吸引資金入場,當中東方海外(00316)半日突升近一成,但又已接近160元阻力,要再向上突破創新高,需要成交配合升勢。之前阿Man講過航運股可維持強勢,可以趁調整收集,不過今日急升就先忍手,反覆市況切忌高追任何一個板塊。

麥狄文
(徐狄怡‧證監會持牌人)

 

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads