繼聯儲局主席鮑爺表示聯儲局唔會隨便咁急收水後，又論到財長耶媽派定心丸，試圖淡化通脹威脅，預期美國到年底通脹率會低於5%，一年以上通脹預期料會穩定喺2%附近水平。市場則睇數字緊要，觀望明晚公布嘅核心個人消費支出平減指數，隔晚美股表現反覆，納指再創新高，道指跟標指則回軟。港股噚日勁彈500點後，今早恒指好淡爭持，目前喺20日線(28841)附近拉鋸。
恒指高開48點報28865，盤中最多升176點，高見28993點，創6月7日以嚟高位，但29000關阻力唔細，遇阻後大市更一度倒跌34點，低見28782點，中午休市前止跌回升。最終恒指半日升21點，報收10679點；國指升5點，報收10679點；恒科指半日升11點，報收8031點。
藍籌股個別發展，今日唔再係海底撈(06862)包尾，雖然股價繼續向下尋底，但唔算跌得多，反而半日創科(00669)跌4.3%，為表現最差藍籌。至於阿里(09988)跟美團(03690)半日則升逾1%，阿里旗下阿里健康(00241)則升近3%，暫時叫搵咗個底出嚟。
光伏股續有資金追捧，內地有報道指，國家能源局計劃推進屋頂分布式光伏開發試點工作，信義光能(00968)半日升4.5%，藍籌之中表現最佳；福萊特(06865)半日亦升逾4%，其他新能源股普遍升1%。
體品股全線回吐，呢個世界又點會有只升不跌股份，呢個板塊喺過去一個月累計升幅唔嘢少，家陣高位有回吐亦屬正常，跌幅由龍頭安踏(02020)跌0.3%至二三線嘅中國動向(03818)半日跌3.3%不等。相對之前嘅升幅，體品股回調幅度唔算大，持貨者仍昔貨如金。
第八批iBond(04246)今早掛牌，暫時高位103.2元，較定價100元升3.2%，如果唔等錢使想財息兼收，而又唔多想承受較高風險嘅投資，繼續持有等埋收息亦無壞。若然閣下慣咗接受風險，亦活躍於股市投資，亦可以先行套利穩袋3%利潤，套返筆錢出嚟繼續炒股。
汽車股近日做好，不過今日跟體品股一樣見回吐，若然相信汽車芯片短缺問題喺下半年可解決，呢個板塊回調正係上車好機會。阿Man就留意緊長城汽車(02333)，剛獲大行調高目標價至32元，相對2021-22年預測市盈率24倍。呢個目標價較現水平若有28%潛在上升空間，25元附近收集等上破26元再挑戰30元，跌穿23元，約20日線止蝕。
麥狄文
(徐狄怡‧證監會持牌人)
