噚日下半場基本上恒指絕大部份時間都係處於保歷加上升通道裡面,本打算出隻恒指熊(50165),以恒指10分鐘圖跌穿100分鐘線(10分鐘圖 x 10線)為落場提示。結果喺下晝2點40分至2點50分見到指數稍為落過下條100分鐘線,但嚴格嚟講指數係無完全失守,最後(50165)只能全個下晝坐喺後備席,直至完場。
依家9點55分,恒指今朝輕微低開之後,依家見跌幅略為擴大,跌50點,做緊28587點,喺五分鐘圖上始見恒指跌勢喘定,但都同聊天室戰友講明下方牛證第一層28400至28499點嗰過千張期指街貨仍然健在,當然大市可以選擇唔向下走,只係以恒指現價同街貨多寡計,下行真係有佢嘅理由;又或者更可能嘅係大家都等緊美聯儲議息,重點唔係佢加唔加息,而係佢會唔會宣布縮減買債規模。
指數難玩就不如試下向個股埋手。其實早在端午節當日喺無得睇龍舟比賽(唔知點解我係好鍾意睇龍舟比賽),就用咗嗰段時間喺Patreon上打咗隻友邦(01299)做當日嘅【每日一股】,個大題仲話佢「準備轉勢」。去到噚日見佢五分鐘都有同聊天室戰友講可以睇住隻友邦,今日見佢U盤時做得唔錯,到完咗U盤之後見佢逆市上升,截至依家10點5分見有1%升幅,似乎真係可以望多幾眼。
日線圖上友邦未算破位,仍然處於「下降通道」裡面,不過股價就接近「下降通道」頂部,上方10天線(96.565元)同150天線(96.518元)作勢開出「死亡交叉」,但同時間下方SlowSTC(14,3)%K線於嚴重超賣水平範圍上破%D線,的確的一個轉轉地勢嘅形態。
「既然係咁,就開佢好倉啦!」進取嘅、想食頭啖湯嘅、甚至係錢多嘅當然可以,但退後一步睇小時圖見到股價目前仍處於20小時線(小時圖 x 20線)之下,而呢條線都真係久久未破,唔好睇少佢嘅阻力,又可以再等下先,【每日一股】會再同大家跟進。
再試下搵其他個股,好日唔睇嘅石藥(01093),見佢五分鐘圖個走勢同噚日恒指一模一樣,SlowSTC(14,3)亦到嚴重超賣水平,依家10點37分,so far都未見SlowSTC(14,3)有回升上行勢頭,有無計等到SlowSTC(14,3)發出買入訊號,博一博隻石藥Call(13588),行使價13.8元,同現價有逾8%價外,引伸偏低,槓桿適中。我見到低(13588)兩行(以行使價排序計)嘅(13030)街貨有成100%喎,Yeah! you know me, man!
作者阿珊,任財經/投資版傳媒人十幾年,《鐘擺戰略贏港股》及《輪證基礎筆記》作者。用技術分析專心玩輪證,唔貪心,志在搵餐下午茶。
Patreon【每日一股】:https://www.patreon.com/cbbcwar
秒投聊天室:https://bit.ly/31HG6AN