美股個別發展，市場觀望聯儲局議息會議，雖然預咗息率唔會有變動，但市場更關注嘅係當局發布嘅經濟預測「點陣圖」，或可對未來息率走勢透露一點倪端。喺目前通脹升溫預期下，聯儲局會否提前加息，對目前美國債券息率嘅走勢有乜嘢影響，鮑威爾嘅言論正正係市場最關注嘅重中之重。港股則好淡爭持，仍然喺10日線(28954)拉鋸。
恒指低開35點報28992，開市有耐就急跌，一度跌247點，見28780半日低位，但低位有買盤吸納，大市止跌回升，一度升152點，高見29180，之後又再度回落，喺二萬九及十日線之間穿梭。恒指半日收報29000，跌27點；國企指數半日收報11346，升16點；恒科指半日收8546，升15點。但成交額半日只有819億元，各界相當審慎。
藍籌股個別發展，大笨象(00005)微升0.1%，友邦(01299)只升0.2%，兩隻重磅股呆呆滯滯，喺未能掌握美債息走勢下，金融股即使已走出谷底，但難以毫無顧忌狂升。唔少大行都認為澳門喺放寬部份人士再入境措施下，濠賭股唔止可以走出谷底，今年仲可以嚟個大翻身，銀娛(00027)股價不單止已完全收復疫情前失地，甚至再重返2014年高位，今日半日再升3.3%。中移動(00941)則升1.3%，計劃回A對其股價有支持，但只有中移動一枝獨秀。
科技股表現反覆，美團(03690)半日升2%，騰訊(00700)半日則跌0.3%，目前表現仍反覆，而阿里(09988)則被央視3．15晚會，點名批評)旗下UC瀏覽器涉及為無資質公司投虛假醫藥廣告，阿里半日跌0.1%，但220元水平料有支持，主要因為其現價估值相對其他重磅科技股相對偏低。恒指新貴阿里健康(00241)半日則跌2.7%，同樣受累有關央視批評。
4S汽車股今日表現標青，連升七日嘅永達汽車(03669)有大行唱好，半日升逾一成，整個板塊見資金流入推動，板塊內股份升1.2%至11%不等。可留意走勢突破嘅龍頭中升(00881)，股價成功收復所有移動平均線，有望擺脫之前反覆上落走勢，再次挑戰前高位，但仍需成交配合。
食品及飲品股今日亦有唔錯表現，當中以啤酒股及乳業股較有睇頭，但整個板塊未似走出上落市格局，暫未宜追入。阿Man唔止一次表示資源股相當難炒，今日資源股跌勢較為全面，貴賤金屬股跟石油股全線下跌，一向唔玩資源股嘅阿Man，繼續食花生。
麥狄文
(徐狄怡‧證監會持牌人)
