美股隔晚急瀉，除咗係疫情未有好轉，美股近日有個別股份出現不尋常異動，引起監管當局關注外，市場亦憂慮拜登嘅刺激經濟方案未有耐可以通過，就算通過規模亦會縮水，美股三大指數隔晚跌逾2%，標指更蒸發今年以嚟所有升幅。港股連跌兩日兼失守10日線(29394)，今日沽壓未止，而內地股市亦腳軟，市場擔心阿爺隨時收水，暫時恒指已回補上周所遺下嘅下跌裂口(28864至29100)，中午暫時力守於20日線(28616)之上。其實阿Man早喺前一個星期已經提過，春節前後內地例牌水緊，就算阿爺已表示貨幣政策維持不變，但在此期間，資動性正常係會較為緊張。
恒指低開382點報28914點，跌幅一度收窄至105點，但沽壓未除又復回軟，半日最多跌658點，見28639點半日低位，但喺20日線附近有支持。半日恒指跌576點，報收28721點；國指跌215點，報收11435點；恒科指中午報收9533點，跌274點，距離萬點大關又退後多一步。
藍籌股大多腳軟，友邦(01299)半日跌4.4%，已三連陰，佢一隻走樣已令恒指唔見130點，逼近50日線約94元應該有支持，95元之前亦有個小型平台，但一旦失守，股價將直指90元，即係11月至12月下旬嘅橫行區，想買貨都係唔使急，又或者分段吸納穩陣啲。大笨象(00005)半日跌近3%，話咗45元阻力無限大，始終未能突破，大笨象又回復上落模式，波動區間係40至44元。至於龍頭科技股騰訊(00700)跟美團(03690)半日分別跌1.3%及1.5%，兩者急升後回至10日線水平，已有缸邊友急不及待想建倉。阿Man唔會反對收集呢兩隻強勢股，只係大市調整未完成，一旦恒指要進一步回落至28500，至28000水平，分段吸納唔使急。阿里(09988)下周二派季度成績表，阿Man對阿里前景仍有信心，250至260之間收集策略不變，若然下周公布業績理想，可能特價時段告一段落。
TESLA上季度業績差過預期，隔晚喺美股跌到一個七皮，今日相關概念股受壓，福耀玻璃(03606)挫5.9%；贛鋒鋰業(01772)瀉5.5%；敏實(00425)跌3.2%；比亞迪(01211)跌4.3%。只係新能源汽車仍然係今年焦點板塊，目前嘅回調，正好係急升過後一個小休機會，休息是為了走更遠的路，回調可能係分段買貨好機會。
內需股今日係食品股跑出。多隻食品股及飲品股做好，升幅閒閒地超過2%，反映資金並非全面散水走人，只係喺不同板塊之間輪動。至於噚日阿Man提過嘅聯想(00992)，今日股價曾低見9.5元，但低位又見買盤積極接貨，阿Man呢期亦最睇好聯想，上半場聯想曾試過倒升，只係大市及整體科技股你氣氛麻麻，令聯想半日亦未能轉回綠燈。
麥狄文
(徐狄怡‧證監會持牌人)
