噚日恒指果然收唔到30000點，而且日線圖上仲見到四個裂口which is吻合「裂口理論」當中提及嘅定義、位置同形成(有關文章Patreon已出，請自行參閱)。
依家10點16分，恒指跌逾300點，做緊29618點。開市無耐都同聊天室嘅戰友講咗恒指5分鐘圖玩咗好耐都過唔到保歷加通道中軸，可以出恒指熊嘅，但由於我忌諱騰訊(00700)隻企鵝企到咁Q高，失心瘋將條恒指搶返上去，所以只係叫大家做快閃黨就算，結果大家今朝第一注恒指熊早走晒，唯有講句：係我唔好囉...
依家10點29分，恒指開始有少少跌定情況；而喺日線圖上，噚日恒指出現咗「十字星」，今日再嚟一個下行300幾點(截至依家為止啦)，陰陽燭圖上都真係出現咗疑似「黃昏之星」嘅物體出現，假如今日稍後時間恒指再儲肥今日粒陰燭嘅話，望返10天級(28955點)，或甚補返星期二(19日)個上升裂口(29100點至28390點)都不為過。
身邊有唔少朋友開始陸續將啲貨減磅，「袋咗落袋先係錢，其他嘅都只係賬面數」N年前師傅教我呢句說話真係終身受用；不過，對於我呢啲遊牧民族嘅Day trade嚟講，其實無論個市係上定落，都係用SlowSTC(14,3)做swing trade就夠。
依家10點45分，較早前喺聊天室度同大家講恒指5分鐘圖SlowSTC(14,3)落到嚴重超賣位可以出恒指牛爬格仔(怕且今日都係高位調整嘅多)，見大家都爬到又可以周圍八下啲資訊。喺街貨圖上見到恒指牛證再有新增街貨層，最貼價上到去28800至28899點，有逾600張期指，重貨嚟架，但都同現價有接近千點差距；不過，如果你喺今日新上市牛熊證個表，或者喺恒指牛熊證嘅search engine嗰度，就會發現到今日新唔少新增牛證，收回水平已經大幅上移到29500點(有29700點嘅但時間關係已經死咗)；同時都有一堆今日新增熊證，亦有部份今日即上即死，依家最貼價嘅收回水平為29900點。假設呢組數不變，換言之聽日(下星期一都得)見到嘅恒指牛熊證街貨兩邊就會拉返好近，牛證會最貼價會上移至29500至29599點，而熊證就係29900至29999點，兩間中間位就係(29599+29900)/2=29749.5點；今日恒指落返嚟呢個位，唔通係企定等下個星期開市返嚟就已經係牛熊街貨中間，再慢慢儲邊一邊肥就打邊一邊？
依家已經11點1分啦，睇日線圖個疑似「黃昏之星」真係好想開淡倉，但呢位啲都真係小心為上，等下半場再算。
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
