美國總統交接完成，拜登正式成為美國第46任總統；特朗普時代終結會為中美關係帶嚟乜嘢新前景？只能拭目以待。
作為一個小股民，可以做嘅就只有睇返條恒指，噚日高呼「三萬，THX！」但可惜最終以恒指最高位29993點，爭7點先成事，唯有先將噚日嘅恒指牛收隊再重新部署。依家9點7分，趁U盤做緊時睇咗恒指牛熊證街貨圖先(講起呢個圖，必須重申有關所有牛熊證街貨嘅數據，包括相當於對沖嘅期指張數，全部都係需要經過港交所(00388)每晚正式發出通告後先可以計到出嚟，而呢粒數因為係經過港交所，所以係合法性；至於以其他方法計出嚟嘅「打靶位」，甚至話比你知有方法計到即市數據，呢粒數準確度有幾高呢，就大家自己衡量啦)。
今日恒指街貨圖上見到熊證最貼價層已經上移至30000至30099點，呢度有相當於224張期指；而由30100至30199點開始向上數至第四層嘅30300至30399點，每層都有500零張期指喺度，而重區貨就喺30200至30299點，有相當於537張期指，當然呢個量比起有時見到過千張漏晒口水嘅係少好多，之但係以近街貨嚟計，都算唔錯架啦。
依家9點49分，恒指其實已經「三萬，THX！」咗，多得騰訊(00700)上到$700嘅鼎力支持，但同時都要小心恒指一上到30000點時可能會觸發獲利盤出現(你估淨係你識減磅咩)，所以恒指呢30000點隨時好似唔夠高嘅小朋友扮高，掂一掂就會縮；但當然，都係嗰句：無論係開恒指牛又好，恒指熊都好，一去到呢啲咁重要嘅齊點大關口位置，做咩Trade都好，應該要以快打慢、見好即收。
恒指牛(58028)，收回價28862點，同現價有逾1000點差距，係目前市場上最貼價嘅恒指牛中槓桿最高嘅一隻，以截至依家10點9分止，恒指由今朝接近10點嘅低位回升返上去，SlowSTC(14,3)都已經由超賣重返到中軸水平，安全嘅等下一次巴士埋站先上車吧！
作者阿珊，任財經/投資版傳媒人十幾年，《鐘擺戰略贏港股》及《輪證基礎筆記》作者。用技術分析專心玩輪證，唔貪心，志在搵餐下午茶。
MeWe/Patreon/FB/IG：輪證贏家
秒投聊天室：輪證教室
