隔晚美股假後做好，市場預期拜登可順利交接，並盡快推出規模達19000億美元刺激經濟方案，加上銀行股業績較預期理想，即使相關股份走軟，但仍能帶動市場氣氛。港股噚日成交額突破3000億元創新高，而北水淨流入亦刷新紀錄，今恒指再下一城，挑戰三萬大關不果，但已連升四日。
恒指高開152點，早段升幅曾收窄至40餘點，其後升幅再擴大，一度升341點，見29984點半日高位，創續2019年5月3日以來新高，但未能攻破三萬關口，之後升勢回順，升幅縮水至34點，見29676點半日低。恒指中午收報29718點，升76點；國企指數報11822點，升87點；恒科指高見9735點，再創新高，半日升3%，報9652。
藍籌股個別發展，阿Man長期愛股騰訊(00700)及美團(03690)再創新高，而批股段段有，段段升嘅藥明生物(02269)最近一次批股亦無例外，批完又再升，半日再創新高升3.1%，而騰訊及美團分別升2.6%及6.4%，但港鐵(00066)勁蝕幾十億，半日跌3.4%，而聯通(00762)同樣跌3.9%，雙雙落後大市。平保(02318)跟安踏(02020)創新高後未能企穩，半日倒跌1.6%及3.6%。睇嚟內地打壓平台經濟對龍頭科技股嘅陰霾已完全克服，家下係等緊阿里(09988)呢個回頭是岸嘅反叛孩子追落後，睇吓呢兩日有冇本事衝破260元阻力。
汽車股跟新能源股，阿Man話咗無咁快玩完，抖氣兩三日又再落鑊，龍源電力(00916)已公布注資及發A股細則，今日創上市新高，半日升12.2%，有大行睇好是次注資及發新股安排，瑞銀大幅調高其目標價至22元，當然亦有大行相當保守，花旗目標價竟然唔到10元，阿Man用個中間價做參考目標，16元目標價都算公道。
至於阿Man力薦嘅吉利汽車(00175)，母企與騰訊簽署戰略合作協定，拓自動駕駛等技術，半日升3.9%；其實有大行睇得吉利好好，目標價訂到58元咁高，阿Man就保守少少，但股價要見40元唔係問題。
睇見咁多股份創上市高位，難免令人有高處不勝寒之感，但基於穿頂唔估頂嘅原則，兼且喺市場生存之道就係順勢而行，一日個市唔回頭，無必要去估頂，畏高唔敢買貨企埋一邊食花生唔緊要，多手做淡等同自取滅亡。
麥狄文
(徐狄怡‧證監會持牌人)
