上周五美股感恩節假期後只有半日市，表現淡靜，納指表現較突出，雖然疫情下大家都要保持社交距離，無見喺周末前嘅Black Friday外出大肆慶祝或瘋狂掃貨，不過唔代表消費意欲喺疫情下減弱，當日嘅網購破頂，而喺疫苗利好消息持續下，市場憧憬經濟復甦有望加快。而市場正判斷明年預期嘅公司盈利反彈，係唔係強勁到足以推動股市上漲，但目前標普500指數成份股嘅平均盈利去到23倍，遠高於長期平均水平15倍。而暫時大部份分析員對標普500公司明年嘅盈利增長預期為22.5%，較季初28%預測為低。
如果收益預期未出現補償性增長，咁一係估值要跟上價格，一係價格下跌就番個估值。有分析指如果疫情導致更長時間封鎖，將令到美股近期風險「偏向下行」，亦意味著明年股價回落機會較大，有分析指即使美股再升，幅度亦有限。但上周五嘅網購刷新高，反映美國消費力未有減弱，或有機會支持企業銷售業績。
恒指今日低開41點，但因為內地11月PMI好過預期，A股今早造好，帶動恒指倒升66點，見26960點半日高位，差一步見二萬七。恒指中午報收26760點，跌134點；國指報10771點，跌18點；恒科指半日升23點，報收8113點。
大市半日乏善可陳，ATMX除咗小米(01810)半日下跌，騰訊(00700)跟阿里(09988)半日分別跌1.1%及3.4%，美團(03690)呢隻準藍籌，半日跌3.7%，今日收市後會派成績表，派成績表前下跌，可能係市場預咗呢一季業績唔夠上一季好，但長遠嚟講，美團業務發展只要交到功課，仍然值得長線持有。
新能源股又翻炒，保利協鑫(03800)半日升逾兩成半，同系鑫新能源(00451)半日升11.4%，其他新能源股普遍錄得超過2%升幅。都係嗰句，新能源股有國策支持，長線係利好，不過急升追貨肯定吃虧，幾時阿Man都唔贊成追升追跌。
暫時資金仍然喺新舊經濟股之間穿梭，不過受客觀環境所局限，舊經濟股唔足以帶動恒指一舉升破二萬七，恒指要進一步突破，或者又要靠恒指成份股中嘅新經濟股帶動，ATMX要齊齊發功，恒指先有動力再向上突破。若然能突破二萬七，向上回補27300至27400，即今年1月底所遺下嘅下跌裂口，恒指進一步邁向二萬八亦有可能，不過喺成份股正式執位前，今日港股要先抖抖，上下半場都係悶到嘔。
麥狄文
(徐狄怡‧證監會持牌人)
