美國總統選舉仍未有正式結果，侵侵已揚言要提出訴訟，拜登則為入主白宮作好準備，而國會選舉則已有結果，參眾兩院繼續由兩大黨平分春色，即係拜登當選要加稅亦唔係佢說了算，反而對美股有利。加上加上聯儲局重申會動用一切工具刺激經濟，預告未來幾個月會購買國債及按揭抵押證券，最少達到目前所購買嘅力度。隔晚美股繼續喪升，不過港股昨日急升逾800點後，今早刷新兩個月高位後回落。
恒指高開54點，曾升104，見25799點半日高位，並創算8月31日以來新高。但25800至26000阻力要突破有難度，其後反覆回落，曾倒跌89點，見25606點半日低位。恒指中午收報25649點，跌46點；國指則報收10447點，跌31點；恒科技半日報收8070點，半日跌111點。
噚日阿Man話咗急升先食糊套現，等個市震盪先再搵位撈貨，呢頭講完，今日唔少股份見完高位就bye bye ，呢兩日創新高升得勁嘅新經濟股，幾乎全部回吐，強如比亞迪(01211)亦難逃新高210元後回吐，半日跌逾4%。不過汽車板塊又唔係全軍覆沒，呢個板塊今日個別發展，呢兩日急升嘅比亞迪跟吉利(00175)齊跌4%，長城汽車(02333)更跌逾半成。但廣汽(02238)逆市升1%，而汽車之家稱東風汽車集團銷量35.16萬輛，按年增長8.8%，東風(00489)勁升17.3%；北汽(01958)亦進帳3.6%。
科技股龍頭騰訊(00700)亦創627元新高，但中午倒跌2.3%，個個都問回到咩位可以買貨，尋日鬼叫大個裂口，唔補晒可能都有機會落番600元，去到呢個位先再考慮亦未遲。阿里巴巴(09988)公布截至9月底止，第二季股東應佔盈利大跌60.34%，隔晚喺美股已率先下跌，今早最低見282.8元，阿Man認為其雲業務如無意外明年扭虧，長線投資喺280或樓下買得過，可以吼位上車。至於呢期跑贏阿里嘅京東(09618)創364.2元新高後亦回吐，半日倒跌1.1%，暫時保住強勢，之前阿Man呼籲310-320之間入定貨等購物節炒高，短炒上到350短線目標或以上，食糊無可厚非，但錯過咗呢一轉，想上車都睇定啲。美團(03690)半日跌2.5%，又係大大個裂口等住補，想買不如等到300至310再考慮。JATMX之中只有小米(01810)半日保持升勢，早段曾高見25.45元，短線26有阻力，24由前阻力變支持，自己睇位炒住先。
醫藥股呢期都係弱，一對藍籌藥股孖寶變咗弱股，中生製藥(01177)跟石藥(01093)半日跌2%，後者未知喺呢個月恒指服務公司季度檢討被叮出局，皆因上次加入咗藥明(02269)，美團未曾染藍，今次美團染藍機會提高，石藥可能係被踢出藍籌家庭嘅弱者。生化醫藥股跌幅更大，一齊甩B股信達(01801)及百濟神州(06160)急轉直下，後者公布業績蝕多咗，但在研藥品進度理想，只係股價走勢轉差，失守10日及20日線後，連170心理關口都守唔住的話，大有可能下試50日線見165元。暫時呢個板塊都係冇得搞，想撈貨未係時候，寧願等跌勢喘定再考慮。始終今日星期五，周末前夕都係嗰句，食下花生咪算囉…..
麥狄文
(徐狄怡‧證監會持牌人)
