隔晚美股腳軟，除咗肺炎疫情喺歐美地區勁反彈之外，新一輪刺激方案應該短期都搞唔掂，加上總統大選逼近，市場喺不明朗兼利淡因素下，避險情緒急升。道指隔晚一度跌近千點，尾市跌幅收窄但都唔見650點，創自9月3日以嚟最大單日跌幅，標指跟納指齊齊跌逾1%，鉊跌64點及188點。雖然美股咁樣衰，但今早又唔算開得好低，恒指低開78點後，跌幅一度收窄至只跌46點，見半日高位24872點，但其後大市反覆向下，失守100日線(24743點)後，跌幅擴大至316點，見24602點半日低位。恒指落到條10日線附近喘定。恒指中午報收24629點，跌288點；國指則跌154點；恒指半日跌10點，主要係靠騰訊(00700)撐住。留意半日成交754億都唔少，唔知係咪有缸邊友沽貨套現抽螞蟻(06688)。
螞蟻今日起至周五招股，將會喺11月5日A股同H股同日登陸中兩地魚缸，每股招股價80元，H股一手50股，每手入場費4040.31元都幾親民。阿Man一向認為抽新股當碰運氣，一係中獎，一係中伏，斷估螞蟻抽中又唔會中伏，但期望唔好咁高，頂多係得個安慰獎咁上下。騰訊因為美國法院唔批制裁微信而勁升創新高，半日升3.3%靠佢撐起個市，否則大市邊有本事守住條10日線。
重磅股今日焦點當然大笨象(00005)，中午公布第三季度業績好過預期，逆市升至個半月高位，半日升1.6%，下半場應該喺優於預期嘅業績及憧憬明年初恢復派息下，股價再升挾爆淡友。雖然阿Man一直唔睇好大笨象，但去到30元邊亦有叫過長情股東無所走，等反彈再考慮逃生亦未遲，至於今次業績有起色，重點係明年若然能恢復派息，即使本來大笨象由四十幾蚊因為停止派息已碌落嚟嘅呢十幾蚊，係咪至明年派息前，可以慢慢收復失哋??阿Man唔敢太樂觀，反而睇住35元有阻力，就算過倒35元，40元樓上蟹貨多多，未必能夠重遊舊地上番停止派息前水平。
股市呢期難玩，尤其之前當炒嘅新經濟股同醫療醫藥股呢期死晒火，唔知係咪股市唔好玩，資金轉戰樓市。近日最矚目嘅新盤，當然係沙田大圍站上蓋項目柏傲莊，第1期連續兩個周末進行兩輪大型銷售，767伙可售單位全數沽清，咁就套現84億元。
講真阿Man就未親身去睇過示範單位，但呢幾年新世界由第三代鄭公子鄭志剛掌舵後，幾個大型項目，包括K11兩個Mall，尤其係連住星光大道嘅K11 Musea項目又確係令市場眼前一亮，相信柏傲莊項目，肯定又係一個有驚喜嘅新盤。打破過往傳統手法經營商場，叫同業汗顏，皆因呢個商場確係同香港任何一個商場大有不同，而鄭公子嘅品味更令人刮目相看。志剛效應令新盤大賣，柏傲莊I推出市場短短兩週，不單破紀錄成為97後收票王，連同期內其他售出單位，本港總合同銷售接近100億元，創下疫市銷售佳績，集團亦已完成2021財年200億元銷售目標近一半。柏傲莊I銷情理想，新世界計劃短期推出柏傲莊II(柏傲莊第2期)應市，估計會同樣賣個滿堂紅。
麥狄文
(徐狄怡‧證監會持牌人)
