熱門:

2020年10月23日 即巿股評 港股直擊

【盤房來料】舊經濟股續推高大市挑戰25000至25200

美股近期窄幅上落,除咗觀望大選選情之外,新一輪經濟方案亦係市場焦點,而眾議院大家姐即表示立法即將敲定,隔晚美股做好。而今早舉行嘅最後一場總統大選辯論未有出現太離譜嘅狀況,市場氣氛未受影響,喺舊經濟股有資金追捧下,港股低開高走,半日表現唔差。

恒指低開13點後跌幅曾跌至102點,見24683點半日低位,但100日線(24732點)見支持,廢老股都識發力,推動港股半日倒升182點,見24968點半日高位。恒指半日報收24983點,升152點;國指中午報收10149點,升64點;恒科指半日跌86點,報7534點,新經濟股唔多精神。

內銀股繼續反彈,建行(00939)跟工行(01398)半日升逾1%,但表現都唔夠本地銀行股強勁。大笨象(00005)總行銅獅重見天日,股價亦重見光明,半日再升3.8%,但留意34.4元係條100日線,而35元阻力更大,有貨喺手咪抱太大期望,再長情都好,係時候接受現實諗諗要唔要分手。恒生銀行(00011)揚3.6%;中銀香港(02388)升2.3%;東亞(00023)升1%;大新銀行(02356)與大新金融(00440)各漲1.6%,雖然銀行股呢幾日表現唔錯,但板塊基本因素暫時冇變,加上又係長周末假期,對住呢啲股食吓花生算,唔需要參與其中。

內銀股有睇頭,內險股亦唔弱,中國太平(00966)半日升7.6%表現強勁;太保(02601)跟新華(01336)半日升逾4%。國壽(02628)跟平保(02318)分別升2.7%及1.5%,財險(02328)半日升3%。其實內險股表現好與壞,跟A股關係較大,A股好,內險好,炒作呢個板塊要睇住A股做人。

石油股追落後,雖然中海油(00883)首三季收入跌28%,但料全年產量可達標,中午升6.2%,藍籌中跑第一。而中石油(00857)跟中石化(00386)半日齊齊升逾5%;中海油服(02883)亦升4.7%;安東油服(03337)半日升3.2%。石油股亦係阿Man唔多like嘅板塊,喺實體經濟情況受疫情影響下,油價難以回復強勢,短線上升唔代表扭轉長期弱勢。不過喺一眾舊經濟股給力下,預期大市於下周結算前或挑戰25000至25200點,而資金喺新舊經濟股之間輪動,喺下月初美國大選舉行前,好趁呢段時間見股份上升而減磅。

中升(00881)半日再升6.8%,再創新高,高盛有報告將其一年目標價上調至100元,更將其列入「確信名單」。汽車股、4S汽車股同相關零部件股呢期表現唔錯,而早兩日強勢創新高嘅比亞迪(01211)見回吐,估計10日線有支持,有意買貨嘅可以吼位。

麥狄文

(徐狄怡‧證監會持牌人)

回上

信報簡介 | 服務條款 | 私隱條款 | 免責聲明 | 廣告查詢 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。

You are currently at: www.hkej.com
Skip This Ads